ORANJESTAD, Aruba
En conexion cu e re-apertura di nos frontera na luna di juni 2020, Aruba Tourism Authority a crea diferente instrumento riba su website oficial pa facilita e comunicacion cu e bishitantenan na momento cu nan ta planea pa bishita nos destinacion.
E website ta conta cu diferente instrumento y ilustracionnan cu ta facilita e bishitante riba e pagina pa yega na informacion necesario. Tin e ‘Safe Travels to Aruba’ cu informacion general di nos isla den e ‘Normal Nobo’, alavez pa e bishitante keda altanto di e desaroyonan turistico pa nos isla en conexion cu Covid-19. E pagina ‘Health Requirements’ ta duna detaye pa por completa e proceso di aplicacion pa e ED card como tambe proceduranan di higiena na yegada na nos isla. E usuario ta wordo informa cu e mester download e Aruba Health App, y e ta haya informacion pa e Aruba Visitor Insurance, cual ta un seguro di biahe obligatorio cu cada bishitante mester tin na ordo pa asina por drenta Aruba.
Relaciona cu esaki, e siman aki a lansa un pagina adicional riba e website aruba.com unda e bishitante ta haya informacion amplio pa cu e rekisitonan rond di test prome cu nan yega Aruba. E pagina aki ta inclui un tool cu ta busca informacion pa e usuario relata na su area geografico. E ta duna e usuario un serie di opcion di unda por acudi pa sondea posibilidad pa yega na e test rekeri y dentro di e tempo rekeri prome cu su biahe. Esaki ta e pregunta cu mas ta bin dilanti di parti di e bishitante! No ta un rekisito facil pa cumpli cu n’e y ta spera cu esaki lo brinda e yudansa rekeri.
Riba e site, na un manera facil e ta duna informacion encuanto e test di Covid-19 cu mester wordo haci door di e bishitante prome cu nan yega Aruba of net na yegada na nos isla. Pa mas informacion por bay riba e pagina aki: https://www.aruba.com/us/traveler-health-requirements/covid-testing
E proposito principal di aruba.com ta pa atrae e turista desea pa nos isla y Aruba Tourism Authority a crea un pagina cu ta enfatisa dicon Aruba ta un destinacion consciente, sigur y ta mustra 8 diferente motibo dicon nos isla ta e destinacion ideal pa vacacion durante e momentonan actual cu mundo henter ta pasando aden.
Mescos cu hopi otro destinacion, Aruba ta pasando den temponan di reto, pero hunto nos lo vence y nos turismo lo sigui florece.