Dia 14 di desèmber diputado Thielman durante e fiesta di fin di aña di Entidat Públiko Boneiru (EPB) a firma un akuerdo ku representantenan di ABVO, sr Ignacio, Hernandez i Sances, kaminda tur empleado públiko ta haña un oumento struktural di 4,75% riba nan salario bruto entrante 1 di yanüari 2023.
De fakto t’asina ku a palabrá un oumento di salario di 4,75% kaminda a hasi e palabrashon adishonal ku tur hende en todo kaso lo bai dilanti ku minimalmente $ 100,– na salario bruto i ku ta oumentá e salario minímo te na e mínimo di eksistensia di $ 1350,– pa luna.
E oumento di salario akí ta basá riba e sifranan di inflashon i e ta un adaptashon provishonal riba e akuerdo di kondishon laboral aktuai 2021 – 2023 i ta drenta na vigor entrante 1 di yanüari 2023. Resientemente a stipulá e akuerdo akí pa personal di Entidat Públiko Boneiru, den kuadro di revitalisashon di e kuerpo di empleadonan públiko, mehorashon di servisio na komunidat i sirkunstansianan laboral adekuá.
- Oumento di salario bruto EPB ku minimalmente $ 100,- bruto pa luna
- Entrada mínimo EPB ta oumentá te na e mínimo di eksistensia di $ 1350,- ku un oumento di $ 100,- pa en total $ 1450,- pa luna
- Salarionan aktual riba $ 2108,- bruto pa luna ta oumentá ku 4,75%
Entidat Públiko Boneiru lo sigui hasi esfuerso pa logra kondishonnan laboral optimal pa su empleadonan públiko den bon kolaborashon ku ABVO komo muestra di apresio pa su empleadonan.
Diputado Hennyson Thielman ke enfatisá ku mediante e akuerdo akí Entidat Públiko Boneiru ta demostrá di ta haña importante ku hende ta gana un entrada ku ta kuadra ku e desaroyonan ekonómiko di nos isla.