Tourism Corporation Bonaire (TCB) ta kontentu di por kompartí diferente informe i storia tokante Boneiru den e mihó medionan di komunikashon na Merka i Oropa komo resultado di e esfuersonan di relashonnan públiko di e ofisina di relashonnan públiko pa Boneiru, Diamond Public Relations.
E enfoke pa e plan di relashonnan públiko pa aña 2024 ta riba sigui generá mas popularidat pa Boneiru na Merka i Canada (aparte di e merkado di buseo) i riba e merkadonan di abla aleman (Oustria, Alemania, Suisa), i krea trènt nobo ku enfoke riba biahamentu solitario, biahe kulinario i biahe di ‘wellness’. Mas aleu ta pone énfasis riba e dedikashon kontinuo di nos isla pa konservashon di naturalesa i di nos kultura lokal, pa atraé bishitantenan ku ta kompartí balornan similar i pa konektá medionan di komunikashon ku nos komunidat lokal pa enrikesé nan propio eksperensianan.
Na luna di yanüari i febrüari 2024 Boneiru a risibí un meskla di atenshon digital, imprimí i riba medionan sosial, loke a resultá den un alkanse total di 62,6 mion riba merkadonan merikano i 5 mion riba merkadonan oropeo.
Puntonan kulminante – Nortamérika
E puntonan kulminante di e último lunanan ta entre otro un sorprendiente menshon riba lista di ‘Best of the World’ di National Geographic pa aña 2024, komo resultado di e ‘pitching’ di e ofisina di relashonnan públiko, kaminda nan a pone Belnem House Bonaire den spòtlait komo un butikhotèl ‘off-the-grid’, i tambe e bida bou di laman i e eksperensianan di naturalesa riba tera floresiente ku nos isla tin pa ofresé. Por a mira Boneiru tambe riba ArtfulLiving.com i den e edishon di wenter 2024 di nan revista imprimí, komo resultado di bishita di e outor freelance Ashley Halpern na luna di mei aña pasá, kaminda el a fiha atenshon riba su estadia na Harbour Village Beach Club i riba otro aktividatnan na kua el a partisipá, manera sambuyá, landsailing, bishitá kueba, kayak, un bishita na Donkey Sanctuary i kome na Brass Boer, Posada Para Mira, Cactus Blue Foodtruck i mas. Un otro resultado di e ‘pitching’ tabata atenshon pa Boneiru riba TravelAgeWest.com den un relato tokante e mihó sitionan pa kore, kana i hasi ehersisio na aire liber den área karibense. E relato a tira lus riba e diferente rutanan pa kana ku ta disponibel den Parke Nashonal Washington Slagbaai, kaminda aventureronan tin e oportunidat pa subi te riba tòp di e serunan ku bista riba nos flamingonan ros den bisindario. Mas aleu nan a destaká Boneiru tambe riba Forbes.com, den un relato tokante eskapadanan sereno den primavera spesialmente pa adulto, i riba Countryliving.com den un relato tokante e mihó destinashonnan fuera di lo komun pa bishitá na aña 2024.
Banda di esaki e ‘Tik Tok Island Hop influencer trip’ di luna di sèptèmber di aña pasá a sòru pa un popularidat masal pa Boneiru riba e konosido plataforma akí, miéntras e Tik Tokernan a sigui kompartí videonan ‘throwback’ kaminda nan ta rekordá nan tempu na nos isla i tur e aventuranan eksitante na kua nan a partisipá.
Puntonan kulminante – Oropa
E puntonan kulminante di e último lunanan ta entre otro un tremendo ‘coverstory’, un storia riba portada tokante Boneiru den e edishon di mas nobo di Quote Magazine i e plataforma online di e luhoso publikashon komersial akí, esta Quotenet.nl, komo resultado di e ‘pitching’ di e ofisina di relashonnan públiko, kaminda a pone vários partner na nos isla den spòtlait, entre otro un entrevista eksklusivo ku Jonnie i Thérèse Boer tokante gastronomia, Brass Boer, Delfins Beach Resort i Restaurant Senang. E ofisina di relashonnan públiko a ‘pitch’ tambe un komunikado pa prensa tokante ’24 eksperensia nobo na aña 2024 na Boneiru’ i esaki a resultá den un tremendo akohida serka diferente medio di komunikashon, manera Reisbizz.nl, Tastytrails.nl, Verkeersbureaus.info, Societyworld.nl, Foodiesmagazine. nl, AllesoverBonaire.nl i mas. E komunikado pa prensa a tira lus riba desaroyonan eksitante, rutanan nobo di buelo pa nos isla i esfuersonan sostenibel, restorantnan i eksperensianan pa aventureronan. Un otro resultado di e ‘pitching’ di e ofisina di relashonnan públiko tabata un reportahe tokante Boneiru den TravelPro Magazine, den un ‘Caribbean Special’, kaminda nan ta destaká e último desaroyonan i esfuersonan di sostenibilidat na Boneiru, inkluso hasiendo menshon di diferente partner na nos isla.
Otro punto kulminante tras di kòrtina ta entre otro un produkshon kulinario popular pa televishon ku a tuma lugá na fin di luna di febrüari na Boneiru, ku vários shèfkòk i talento lokal, ku nan ta bai transmití mas lat den e aña akí riba e kanal di televishon Disney’s 24Kitchen.
Na kaminda
Den luna di aprel TCB, den kolaborashon ku Diamond Public Relations, ta organisá un rekorido pa prensa ku komo tema ‘Bites & Nights’, kaminda e enfoke lo ta riba eksperensianan eksklusivo di gastronomia ekselente i ‘e momentunan despues ku solo baha’ di nos isla.
TCB ke gradisí tur partner i stakeholder partisipante for di sektor privá pa nan sosten i kolaborashon kontinuo ora di ‘media hosting’.
