Prome Minister Demisionario, Evelyn Wever-Croes ta remarca cu e
formacion di e siguiente gobernacion ta durando mucho largo y ya caba esaki ta refleha
efectonan negativo pa Aruba. Entre otro, e Presupuesto 2025 no por wordo trata cu ta un fayo
cu ya a bay riba e radar di Rijksministerraad.
Presupuesto 2025:
Gobierno di Aruba, Minister di Finansa y fraccionnan den Parlamento a haci peticion na
Parlamento pa trata e presupuesto pero esaki te ainda tawata envano. “Mi ta lamenta esaki
pasobra bou di Gabinete Wever-Croes I y II, semper a logra desde aña 2022 pa entrega
presupuestonan na tempo pa asina por trata nan na tempo. Ta di lamente cu e tendencia aki ta
wordo kibra awo simplemente door di tardansa di formacion di gobierno”, Prome Minister a
duna di conoce.
Prome Minister a expresa su opinion cu e Presupuesto 2025 por wordo trata pasobra no tin
maneho den dje, esaki ta loke ta wordo yama ‘beleidsarm’. Cu otro palabra no tin
inversionnan grandi di maneho den e presupuesto cu ta mara e siguiente gobierno. Ademas,
Prome Minister a remarca, e siguiente gobierno despues di su formacion, mesora por entrega
un voorjaarsnota cu su cambionan cu e ta desea.
E Presupuesto 2025 cu a wordo entrega hunto cu e nota di cambio, ta mustra un surplus di
1.9% den e presupuesto y pa e sector colectivo 3.5%, mientras cu pa ley esaki mester ta 1%.
Esaki kiermeen cu e gobierno nobo tin di biaha entre 0.9% y 2.5% extra surplus cu e mes por
gasta.
Diferencianan fundamental:
Prome Minister a remarca cu e tardansa di formacion di un gobierno nobo ta debi cu e dos
partidonan cu ta formando di naturalesa no tawata alinea cu otro. Partidonan AVP y FUTURO
tawata tin diferencianan fundamental den nan posicionnan y nan visionnan. Entre otro, e
promesa di AVP di aumenta e pensioen di biehes considerablemente mientras cu FUTURO
publicamente a declara cu nan ta contra.
Un otro diferencia fundamental entre e dos partidonan formando ta e relacion cu Hulanda.
FUTURO kier un bon relacion cu Hulanda mientras cu AVP, awe ainda na Den Haag ta
conoci pa e mal maneho financiero cu a conduci na un curatela financiero na 2014 cu un KB y
e reaccion e tempo ey di welga di hamber di Mike Eman como e prome minister di Aruba .
Awo ta e mesun Mike Eman ta aspira un biaha mas pa bira prome minister di nos pais.
Prome Minister a menciona un di tres diferencia fundamental entre e partidonan cu ta
formando gobierno, y esaki ta e negosacionnan cu Hulanda riba e posicion si mester bin un
rijkswet of no. FUTURO kier un rijkswet y AVP no kier un rijkswet. Y finalmente, tin e
landspakketnan, cu ta e palabracionnan haci entre Aruba y Hulanda pa loke ta trata e
reformanan. AVP ta contra esakinan.
E diferencianan fundamental aki no tin entre partidonan MEP y FUTURO, pa cua motibo un
coalicion entre MEP y FUTURO lo a parce un relacion mas natural. Ta parce cu AVP y
FUTURO ta wordo forsa pa yega na un acuerdo di gobernacion. Pa yega na e acuerdo aki, e
formadonan a haya te 13 di maart proximo pa logra.
Prome Minister: “Ami ta spera di berdad cu e formacion por keda cla lihe pasobra Aruba no
por warda mas largo. Mientras tanto nos lo sigui goberna nos pais y lo sigui atende casonan
coriente riba e mesun forma responsabel, buscando solucionnan manera nos a bin ta haci