Apresiabel Gezaghèber, apresiabel kolegio,
E último tempu preokupashon denter di e komunidat di Boneiru ta subiendo notablemente relashoná ku insidente violento serio, insidente ku uso di arma di kandela, kriminalidat hubenil i komportashon den tráfiko ku ta kousa molèster. E problemátiko ta ekstendé su mes di kiebro den vehíkulo i den kas te ku atrako violento. Sifranan resien di kriminalidat i tráfiko 2024 di Kuerpo Polisial Hulanda Karibense (KPCN) ta konfirmá ku e preokupashonnan akí no ta sin base.
Algun tendensia preokupante:
· E kantidat di denunsia di insidente doméstiko ku violensia na 2024 a bira dòbel te na 140 kaso.
· Ladronisia den vehíkulo a subi drástikamente pa 138 denunsia entregá, kasi un duplikashon kompará ku 2023.
· Ladronisia na sitionan di buseo a subi drástikamente di 10 (2023) pa 54 denunsia.
· Tabatin 18 intento di homisidio, un duplikashon kompará ku aña pasá.
· E kantidat di insidente ku arma di kandela a subi pa 77 denunsia , ku 66 arma di kandela konfiská.
· Polis a arestá 27 menor di edat pa kondukta kriminal.
Konsiderando e desaroyonan akí i e preokupashon di habitantenan, na nòmber di e frakshon di MPB mi ta hasi e siguiente preguntanan:
Pregunta
1. Kon e triángulo atministrativo ta opiná tokante e oumento fuerte di insidente ku arma di kandela, i kua medida nobo ta konsiderá pa limitá e disponibilidat di arma di kandela, netamente bou di hóbennan?
2. Kua akshon a tuma denter di e triángulo atministrativo relashoná ku e oumento resien di insidente violento?
3. Tin bista riba e motibunan tras di e oumento di insidente violento, inkluso e duplikashon di intento di homisidio i e uso oumentá di arma?
4. Konsiderando e kantidat grandi di sospechosonan hóben: kua akshon konkreto preventivo i represivo a tuma òf a plania pa kombatí kriminalidat hubenil?
5. E bahada den aktividat di konstrukshon riba e isla ta kondusí na oumento di desempleo den e sektor di konstrukshon, loke ta oumentá e riesgo di problemanan sosial i kriminalidat. Ki medidanan Konseho Ehekutivo ta tumando pa ofresé trahadónan di konstrukshon desempleá perspektiva, por ehèmpel pa medio di rekapasitashon, proyektonan temporal òf despliegue den otro sektornan?
6. Kua programanan di prevenshon aktual òf planiá ta dirigí spesífikamente riba hóbennan ku ta kore riesgo di komportashon kriminal òf ku ta kousa molèster? Kon ta evaluá e impakto di e programanan akí?
7. Ku e oumento fuerte den e kantidat di insidente di kiebro den vehíkulo i den kas: ta hasi esfuersonan èkstra pa monitoriá i pa detektá na lugánan vulnerabel, manera sitionan di buseo i komodidatnan pa turista?
8. Kon Entidat Públiko ta traha huntu ku KPCN, skolnan, klupnan deportivo i organisashonnan sosial pa ofresé alternativa na gruponan di riesgo bou di hóben i pa prevení residivismo?
9. Bo ta dispuesto pa duna un reportahe públiko periódiko tokante insidentenan ku arma di kandela, kriminalidat hubenil i seguridat den tráfiko den konsulta ku KPCN, di manera ku e tendensianan ta bira mas lihé visibel pa gobièrnu i pa siudadanonan?
Gustosamente nos ta spera di risibí bo kontesta pronto i ta konfia ku seguridat i kalidat di bida lo keda prioridatnan denter di e polítika di maneho.