By June, provedor di vakashon chikí i parti di Corendon, ta duna un euro na Carmabi (Caribbean Research and Management of Biodiversity Foundation) pa kada pasahero ku e ta trese pa Kòrsou. Pa setenta aña kaba, Carmabi na su turno ta dedika su mes na maneho di naturalesa, investigashon siéntífiko, edukashon i protekshon di biodiversidat riba Kòrsou.
By June ta ofrese ekskurshon úniko i sostenibel, pa di e forma aki no solamente duna su huésped un eksperensia speshal, sino tambe duna nan e oportunidat pa kontribuí direktamente na preservashon di nos naturalesa. E kolaborashon aki ya a kontribuí tanto ku supporto finansiero komo ku yudansa konkreto pa proyektonan di Carmabi den área di konservashon di naturalesa i edukashon.
Siman pasá e sosten aki a bira akshon konkrèto: empleado di Carmabi, hoteleronan di By June i menedjer di sostenibilidat di Corendon Kòrsou a kosechá mangrove yong den Curaçao Rif Mangrove Park i planta esaki na nan turno den e parke natural Seru Largu pegá ku saliña di Willibrordus.
“Grasias na partnernan manera esaki, nos por usa nos konosimentu i eksperensia pa restaura i protehá ekosistema fragil na Kòrsou,” asina Manfred van Veghel, direktor di Carmabi, a deklara. “Huntu, nos ta sigurá ku tanto naturalesa komo komunidat aki lo keda benefisiá pa futuro.”
Mangrove tin un papel krusial den mundu pa protehé kosta kontra eroshon, ta ofresé hábitat pa un monton di bestia, i tambe ta absorbé grandi kantidat di CO₂.
