Durante e reunion den Parlamento riba e rijkswet HOFA, por a nota cu den e prome tanda, e conversacion tabata hopi riba e bestuurlijk akkoord cu Gabinete Wever-Croes a firma na 2024. E por ta cu hopi no ta compronde kico e “bestuurlijk akkoord” aki ta encera, of simplemente kier pretende di no ta compronde pa asina purba bruha tera.
Riba esaki Parlamentario Evelyn Wever-Croes a bolbe splica un biaha mas na tur presente kico e “bestuurlijk akkoord” aki ta encera. “Lagami ta hopi enfatico un biaha mas : e “bestuurlijk akkoord cu mi a firma na 2024 ta un intencion di e dos gobiernonan pa negocia, e no ta un documento “bindend”, e no ta mara gobierno. Profesornan den ley a declara esaki, y e ministernan Wever y Eman tambe a declara esaki. E NO ta mara ningun gobierno. E acuerdo tabata un paso strategico, pa Aruba keda cu Hulanda na mesa di negociacion, pa trata di yega na un mihor deal pa Aruba”.
Gobierno di Gabinete Wever-Croes II hunto cu un ekipo di profesionalnan a traha duro riba e preparashon riba “ambtelijk niveau”. Pero ora a yega na e fase di negociacion final “bestuurlijk niveau”, e ministernan di e gobierno AVP/Futuro, cu mester a defende Aruba, a laga di desea, y nan no a logra un bon acuerdo. E Gobierno AVPFuturo no a negocia drechi cu Hulanda, y a yega entrega.
“Mi a enfoca riba esaki den prome tanda. Nos a puntra e ministernan cuanto biaha nan a reuni, con nan a negocia, y cua tabata e puntonan cu gobierno a negocia “op bestuurlijk niveau”, pero riba e preguntanan aki tampoco tabata tin reaccion. P’esey nos di fraccion di MEP ta conclui cu e gobierno di AVPFuturo a yega entrega sin negocia”. Parlamentario Wever-Croes a expresa.
Press release: MEP