Recientemente Parlamento di Aruba a trata e consencus Rijkswet HOFA den Parlamento. Lamentablemente e mayoria den Parlamento esta 11 Parlamentario tabata na fabor di esaki, pues gobierno por sigui encamina e proceso cu Hulanda. Esaki sigur ta un situacion lamentabel pa Pais Aruba considerando cu Aruba por perde su autonomia financiero, cual ta un parti cardinal di ta un pais autonomo den Reino Hulandes.
Parlamentarionan den oposicion no ta stop di lucha y nan lo haci uzo di tur herment disponibel pa pa logra un mayoria cu ta contra di e Rijkswet manera cu e ta aworaki. Aworaki tin 10 parlamentario cu a expresa nan procupacion y a vota contra di e Rijkswet, esaki ta inclui parlamentarionan di partido MEP, PPA y Mike de Meza di AVP.
Pa motibo cu gobierno ya a entrega e Rijkswet na Hulanda, no tin mucho cos cu por haci na e momentonan aki mas, te na momento cu e cana su caminda y yega Tweede Kamer. Ora e ta na Tweede Kamer lo por presenta un verslag den cual ta indica cu Parlamento di Aruba no ta di acuerdo, esey ta den caso cu un parlamentario mas, realisa y educa su mes riba tur e consecuencianan negativo cu e Rijkswet aki tin pa Aruba. Bayendo di acuerdo cu e ley aki, Parlamento a comete un eror grandi lubidando e lucha cu nos antepasadonan tabatin cu a conduci na Status Aparte
Aruba su autonomia ta bou di presion
E lucha cu a conduci na Aruba su autonomia a cuminsa for di hopi aña prome cu a logra esaki. Mas cu 80% di pueblo e tempo ey, a vota via un referendum na fabor di e cambio di statuto pa Aruba por ta un pais autonomo. Un di e motibonan cardinal pa cual hopi tabata na fabor di e cambio aki tabata pa e posicion cu Aruba tabatin prome cu 1986. Hulanda tabata duna instruccion via Corsou pa Aruba, pues Aruba no tabata liber pa dicidi kico ta mihor pa e pueblo Arubano. Bo por mira e situacion na Aruba di prome cu 1986 y bo por mira despues di 1986 con Aruba a su economia a crece y e pais a desaroya exponencialmente.
Cu e Rijkswet manera cu e ta aworaki riba mesa, gobierno di Aruba ta bay di acuerdo pa duna Hulanda e ultimo palabra un bes mas ora cu ta trata decisionnan financiero di Aruba. Bo no por maneha un pais sin tin control di finanzas, pues a traves di e ley aki ta entregando e autonomia di Aruba.
Autonomia ta algo sumamente importante.
Cu e Rijskwet HOFA ta papiando di pone e poder di haci cambio den man di Konikrijksministerraad. E Koninkrijksministerraad ta consisti di mas di 20 minister di Hulanda y un gevolmachtigde minister di Corsou, uno di Sint Maarten y normalmente uno di Aruba, sinembargo no tin ningun persona den e funcion ey actualemente pasobra gobierno actual ainda no a apunta uno. Mester agrega cu ora cu decisionnan wordo tuma den Koninkrijksministeraad, hasta na momento cu e ta toca bo pais, bo no tin derecho di voto.
Pesey e ta hopi importante pa pueblo lanta ariba y cuestiona parlamenarionan y gobierno cu ta na fabor di ley aki. Mester exigi di nan como representantenan di pueblo pa no entrega e autonomia cu Aruba a lucha pa yega na dje. Tin posibilidad ainda pa para esaki si logra cu ma parlamentario expresa nan preocupacion y ta contra di e Rijkswet.