Entidat Públiko Boneiru, Streefkerk Architects &
Consultants i Caribische Onderwater Werken a firma un akuerdo pa mantenshon di Waf
di Piskadó na Playa Pabou. Ku esaki e fase di preparashon di e proyekto a kuminsá
ofisialmente. Ku e paso akí ta duna ehekushon na mantenshon di Waf di Piskadó, ku pa
basta tempu kaba for di komunidat nan tabata pidi atenshon p’e.
Den e promé fase nan ta hasi e preparashonnan nesesario. Nan ta bestèl material di
kalidat haltu pa pèrkurá ku ta restorá e waf na un manera sólido, seif i duradero. Pa
medio di skohe pa material adekuá, nan ta traha pa logra un solushon ku ta dura hopi
tempu i ku ta resistente kontra sirkunstansianan di laman.
E piskadónan di Boneiru ta forma un komponente importante di nos komunidat. Nan ta
kontribuí na nos ekonomia lokal i nan ta parti di nos kultura i nos tradishonnan. E waf ta
nan sitio di trabou. Pa e motibu akí ta importante ku esaki ta den un estado stabil i seif.
Asina ku tur material ta disponibel, e trabou di mantenshon ta kuminsá. Nan ta bai hasi
esaki den diferente fase. Esaki ta nifiká ku nan no ta sera e waf kompletamente. Di e
manera akí e piskadónan por sigui hasi nan trabou i kontinuá ku nan aktividatnan di tur
dia.
E proyekto akí ta un invershon den futuro di e piskadónan i den e komunidat Boneriano.
Ta trata di un paso importante i positivo pa tur hende ku ta hasi uso di Waf di Piskadó.
Mas informashon tokante komienso di e trabou ta sigui dentro di poko.
Preparashon a kuminsá pa mantenshon di Waf di Piskadó na Playa Pabou
