Minister di Salubridad Publico, Desaroyo Social i Labor (VSA), Richinel Brug, siman pasa a continua una bes mas cu su iniciativa comunitario mediante distribucion di productonan fresco (fruta i berdura) na gruponan vulnerabel rond di Sint Maarten.
E iniciativa aki ta forma parti di un enfoque mas amplio di e Ministerio di VSA yama “Salubridad den Tur Maneho” (Health in All Policies) cu a wordo estableci aña pasa, cual ta reconoci cu salubridad publico ta bay mas aya di cuido di salud so, i ta inclui siguridad di cuminda, nutricion, apoyo social i bienestar comunitario.
Siguiendo un iniciativa similar cu a tuma lugar na december, e Ministerio a colabora cu iglesianan, hogarnan di anciano, comedornan popular (soup kitchens), organisacionnan comunitario i personanan clave padintra di e comunidad pa distribui fruta i berdura fresco na programanan di cuminda i na personanan cu tin mester.
E iniciativa aki ta bini tambe na un momento caminda hopi famia ta sigui duna di conose e efectonan di e subida di costo di bida, aumento di costo di combustibel i utilidad (awa i coriente), i presionnan economico mundial cu ta bini di conflictonan internacional i guera, cualnan ta sigui afecta economianan di islanan chikito manera Sint Maarten.
Minister Brug a enfatisa e importancia di sostene famianan vulnerabel i di fortalece e lasonan di cooperacion cu organisacionnan cu ta sigui duna asistencia na e comunidad diariamente.
“E iniciativa aki ta trata di compasion, dignidad i di asegura cu e personanan cu tin mester sa cu nan no ta lubida,” Minister Brug a declara. “Algo asina simpel manera acceso na productonan fresco por haci un diferencia significante pa famianan, ancianonan i programanan comunitario di cuminda.”
“Siguridad di cuminda ta keda un prioridad importante pa Ministerio di VSA. Una bes cu e presupuesto di aña 2026 keda aproba, nos tin e intencion di expande i fortalece mas ainda e iniciativanan duna na sostene gruponan vulnerabel i mihora e acceso na cuminda nutritivo padintra di nos comunidadnan,” e Minister a agrega.
“Nos ta comprende cu ningun iniciativa individual por soluciona tur desajuste social of economico cu nos pueblo ta enfrentando,” e Minister a expresa. “Pero cada esfuerso ta conta. Ora cu gobierno, fundacionnan (NGOs), iglesianan, gruponan comunitario i boluntarionan tur sigui haci nan parti, huntu nos por haci un diferencia den bida di hende. Como comunidad, nos mester sigui cuida nos ruman nan.”
Minister Brug a destaca cu mihoracion di salubridad publico ta significa tambe inverti den medidanan preventivo, estilonan di bida mas saludabel i sistemanan di apoyo social mas fuerte den henter e pais.
E Ministerio di VSA ta keda compromete na iniciativanan cu ta promove bienestar comunitario, fortalece e rednan di apoyo social i mihora e calidad di bida pa e pueblo di Sint Maarten.
