Parlamentario Xiomara Maduro ta cuestiona Minister di Finansa Geoffrey Wever despues cu un documento oficial publica den e Landscourant di 10 di juli 2026 ta lanta preguntanan importante tocante e aumento di accijns riba gasolin y diesel dia 8 di juli.
Segun Maduro, e asunto no ta solamente si Gobierno por aumenta accijns, sino si e procedemento legal prescribi pa ley a wordo sigui.“Den un Estado di Derecho, Gobierno no por simplemente tuma un decision. Ora ley ta prescribi un procedura, e procedura aki mester wordo sigui. Esaki ta precisamente loke nos ta cuestiona,”Maduro a declara.
Den e documento oficial, e minister ta indica cu e accijns a wordo ahusta y tin efecto for di 8 di juli 2026. Sinembargo, e mesun documento ta contene e siguiente frase:”…vooruitlopend op de codificering in de wetgeving en in afwachting van de vaststelling van een Landsbesluit…”
E frase aki ta lanta un pregunta fundamental:“Si e minister mes ta reconoce cu e Landsbesluit ainda tabata ‘in afwachting’, cual tabata e base legal pa e aumento cu a drenta na vigor dia 8 di juli? Esaki ta un pregunta completamente legitimo cu pueblo merece haya un contesta cla.”
Maduro ta enfatisa cu e documento ‘Voortzetting Tijdelijk Besluit Accijnsverlaging 2026’ publica den Landscourant y firma pa e minister, no ta un Landsbesluit. E documento mes ta referi na un Landsbesluit, houdende algemene maatregelen, cu ainda ta pendiente di wordo traha.
Cu otro palabra, e minister mes den su propio documento y den su propio palabranan ta bisa cu e Landsbesluit tabata ‘in afwachting’. Dus cu e base legal no tey.Maduro ta accentua cu e asunto aki ta toca un principio fundamental di bon gobernacion: ningun persona, ni sikiera un minister, ta para riba ley.
“Ora Gobierno ta exigi pa ciudadano sigui ley, Gobierno mes ta e prome yama pa duna e bon ehempel. Transparencia y respet pa e Estado di Derecho no ta opcional.”
Parlamentario Maduro ta pidi Minister Wever pa duna claridad y splica pueblo:
Cual ta e base legal pa e aumento di accijns cu a drenta na vigor dia 8 di juli 2026?
Pakico e documento ta declara cu e Landsbesluit ainda tabata “in afwachting”?
Con e procedura ta ora ta subi accijns conforme e Landsverordening accijns en minerale oliën?
“Ora tin duda riba e procedura legal pa aumenta un belasting cu ta toca tur ciudadano, Gobierno tin e obligacion di contesta cu documentonan y argumentonan legal. Transparencia ta fortalece confiansa den nos institucionnan.”
