Joran van der Sloot, kende ta actualmente encarcela na Peru, a oficialisa un peticion pa wordo trasladá pa un otro prizon. Segun informacion di e canalnan di noticia Peruano America TV y Canal N, e Hulandes di 39 aña ta declara cu e ta sinta su sentencia bou di circunstancianan peligroso, unda e ta enfrentando menasa constante di morto.
Tortura psicologico y menasa di morto
Den e peticion cu medionan peruano a logra mira, Van der Sloot ta skirbi cu e ta víctima di abusonan severo door di su compañeronan di cel.
“Mi ta víctima di tortura psicológico casi tur dia,” Van der Sloot ta duna di conoce den e documento. “Nan ta menasa mi cu morto, y esei ta afectando mi salud mental. Y nan ta menasa no solamente ami, ma tambe mi famia.”
E condicionnan duro na Challapalca
Actualmente, Van der Sloot ta cera den e prizon di Challapalca, situá den e parti zuid di Peru. E institucion aki ta conoci como un di e prizonnan mas teribel y isola di e pais, unda ta tene e criminalnan mas peligroso. E localidad tin
caracteristicanan extremo:
Situa na un altura di 4,600 meter riba nivel di lama.Condicionnan climatologico extremamente friu, specialmente durante oranan di anochi.Acceso masha dificil pa bishitantenan por yega e sitio.
E situacion den e prizon no ta nobo pa controversia. Na december di aña pasa, a yega di haña Van der Sloot gravemente herida den su cel, unda segun e corant La Repubblica, el a purba di tuma su propio bida.
E Hulandes ta suplicando pa un cambio di establecimento, afirmando cu e administracion di prizon ya caba lo a acorda riba e traslado. Sinembargo, un hues mester duna aprobacion formal prome cu esaki por tuma luga. Pa awor, ta keda pendiente ki ora cu corte lo trata e peticion aki.
Van der Sloot ta sirbiendo actualmente un sentencia di 28 aña di prizon na Peru pa e asesinato di e studiante peruano Stephany Flores, banda di un sentencia adicional di 18 aña pa trafico di droga.
Ademas di su condenan na Peru, Van der Sloot a ricibi un sentencia di prizon di 20 aña na Merca. Na 2023, el a duna un confesion impactante unda el a admiti di a mata e studiante Mericano Natalee Holloway. Maske el a confesa, el a yega na un acuerdo di sentencia reduci unda el a keda condena solamente pa extorsioná e mayornan di Holloway, y no pa e asesinato mes.