Nan a nominá Tourism Corporation Bonaire (TCB) pa Vakantie Award 2023. Durante e Reisgala di Travmagazine nan ta anunsiá e ganadó di e Vakantie Award.
E bunita evento akí ta tuma lugá riba djasabra 28 di yanüari 2023 den Hart van Holland na Nijkerk. Tur kos ta mustra ku manera kustumber esaki ta bai bira un tremendo anochi atrobe, kaminda e sektor di biahe lo wak bèk riba e aña tras di lomba, pero prinsipalmente lo wak positivamente dilanti den direkshon di futuro. No ta pòrnada e tema ta ‘Proud to be in travel’.
A nominá Tourism Corporation Bonaire den e siguiente kategorianan:
– Ofisina di turismo
– Sostenibilidat
‘Manera tema di e anochi ta bisa, Proud to be in travel, TCB ta ‘Proud – Orguyoso’ ku e nominashonnan,’ según Miles B. M. Mercera, direktor di TCB. ‘Danki na e esfuersonan pa preservashon di naturalesa di Boneiru, nos ta distinguí nos mes komo un sitio di pasa vakansi ku enfoke riba sostenibilidat, desaroyo ekonómiko i kultura. E ‘rebranding’ di tur nos ekspreshonnan ta duna forsa na e desaroyonan akí, It’s in our nature’.
Vota pa TCB den e dos kategorianan riba e lenk akí: https://www.travmagazine.nl/vakantie-awards/ Por vota te ku djaluna 2 di yanüari 2023.