Aruba TurismoFeatured

ABC Tours ta pone Aruba luci den top di atraccion turistico na nivel mundial

Abc Tours Travelers Choice World 4

E resultado di e tan renombra ‘Travelers Choice Awards’ di Trip Adivisor pa 2022 a keda conoci recientemente, caminda cu ABC Tours & Attractions a pone nos ‘One Happy Island’ resalta den mas cu 1 categoria. Entre e premiacionnan, e “Natural Pool & Indian Cave Jeep Safari” di ABC Tours a keda posiciona #1 Den Caribe y #4 na nivel Mundial.

Ademas, otro categoria cu a destaca ta esun di e “Top Bucket List Experiences-World”, caminda cu e excursion di “Blackstone Beach, Cliff Jump & Hidden Treasures” di ABC Tours a keda na #5 den e ranking internacional di plataforma renombra aki. Un noticia cu a cay como un sorpresa hopi grandi pa e famia y ekipo completo di ABC Tours & Attractions.

Den un mundo actual caminda cu cada ‘review’ di turista cu bishita nos isla por laga un impacto grandi atras, e resultadonan aki ta demostra cu Aruba ta sigui ofrece un producto excepcional di calidad halto riba mercado internacional. “Nos ta hopi orguyoso di henter nos ekipo cu semper ta desplega un trabou profesional, fun y ta laga e turista atras cu e miho impresion di nos isla. Trip Advisor ta confirma esaki un biaha mas”, asina Marvin Kelly propietario di ABC Tours a expresa.

E prome premiacion cu ABC Tours a ricibi di Trip Advisor tabata na 2019, caminda e excursion principal a keda na di 3 luga den Caribe. For di e momento aki, Gerencia di ABC Tours a cuminsa pone mas enfasis pa mehora servicio, calidad, trece medida di seguridad mas preciso, mas atencion pa naturalesa y nos medio ambiente, combina cu un ‘wow factor’ cu lo diferencia nan for di otro tour similar rond mundo.

Desde 2020 pa awo, a inverti den un flota di 10 Jeep Safari completamente nobo, y hasta durante temporada di incertidumbre den pleno pandemia a probecha pa modifica e diseño y ‘revamp’ tur e jeep nan aki pa trece mas seguridad y comodidad na cada turista como tambe un balor agrega na cada experiencia.

Loke a cuminsa como un negoshi local di 3 persona na aña 1995, awe ta un ehempel bibo di con nos Arubianonan por triunfa na nivel mundial y ta haci un aporte grandi na Aruba como producto turistico. Cu mas di 25 aña di experiencia, ABC Tours & Attractions ta demostra cu e inversion y desaroyo continuo den transcurso di añanan combina cu e esfuerso di henter ekipo ta duna su fruto y ta trece hopi mas logro pa celebra.

Abc Tours 3Abc Tours 1Abc Tours 2 Scaled

Related posts

Parlamentario Gerlien Croes : Gobierno cu 43 miyon extra na gasto operacional den presupuesto

EA News Author

Gobièrnu i Sindikatonan di Gobièrnu a firma akuerdo di formashon di Wardakosta

EA News Author

Leave a Comment

Whatsapp Message