Dia 18 di maart, Su Mahestad Rey Willem-Alexander a realisa un bishita oficial na Aruba den marco di dos ocasion historico importante: e 40 aniversario di Status Aparte y e 50 aniversario di bandera y himno nacional di Aruba. E bishita a pone enfasis riba e desaroyo constitucional di e pais y e identidad nacional, mientras tambe a destaca e relacion continuo dentro di Reino Hulandes .
E programa oficial a cuminsa na Gabinete di Gobernador, unda Gobernador Alfonso Boekhoudt a ricibi e Rey. Despues, e delegacion a move pa Bestuurskantoor, unda un presentacion cultural tradicional a tuma luga, resaltando e herencia y orguyo nacional di Aruba. Mas despues, e Rey a atende un ceremonia di “groundbreaking” na Roly Bislik Olympic Pool na Savaneta, marcando un inversion importante den facilidadnan deportivo pa comunidad.
Durante e bishita, e Rey tambe a reuni cu diferente autoridadnan, incluyendo representante di gobierno di Aruba y lidernan militar di Reino Hulandes, unda a intercambia puntonan di bista riba temanan manera siguridad, cooperacion y desaroyo regional. E encuentro aki a subraya e importancia di colaboracion continuo entre Aruba y Hulanda.
Sinembargo, paralel cu e programa oficial, e bishita a wordo marca pa un manifestacion pasivo organisa pa sindicatonan. E accion tabata relaciona cu e situacion di HOFA. Esaki tabata un momento historico pa Aruba
Segun Jose Figaroa, presidente di sindicato FTA, e protesta no tabata masivo, pero si efectivo. El a indica cu e cantidad di participante tabata basta pa haci e mensahe yega, no solamente na Hulanda, sino tambe na Parlamento y Gobierno di Aruba. Segun Figaroa, e meta principal ta pa pone presion y crea consciencia riba e problematica actual a wordo logra y kico Aruba lo perde si e Rijkswet HOFA aki bira un realidad.
E manifestacion a keda den un ambiente pasivo, pero cu un mensahe cla: sindicatonan ta busca atencion pa e impacto di decisionnan manera HOFA riba e clase trahado cu ta e pueblo di Aruba, y nan ta insisti riba dialogo y accion concreto.
E bishita di Rey Willem-Alexander asina a combina celebracion historico cu expresion di preocupacion social, reflehando tanto e orguyo nacional como e reto nan cu Aruba ainda ta enfrentando den su desaroyo.
