BonaireFeatured

Bon konsulta entre Kolegio Ehekutivo i minister di enseñansa Dijkgraaf tokante rekuperashon i desaroyo

Bon Konsulta Entre Kolegio Ehekutivo I Minister Di Ensenansa Dijkgraaf Tokante Rekuperashon I Desaroyo

Den kuadro di e Konsulta di Kuater Pais (Vierlandenoverleg) i e Aña di Konmemorashon di Pasado di Sklabitut, Kolegio Ehekutivo a risibí minister Robbert Dijkgraaf di Enseñansa, Kultura i Siensia. Den e konsulta akí tantu e eksperensia for di e Konsulta di Kuater Pais i e agènda di enseñansa di e minister a bini dilanti, i tambe e prioridatnan di Kolegio Ehekutivo tokante e tópikonan akí. Gezaghèber Rijna i e diputadonan Tjin Asjoe i Kroon ta wak bèk riba un konsulta fruktífero.

Enseñansa

E minister a kuminsá su bishita na Boneiru i djabièrnè a klousurá esaki na nos isla tambe. Durante e bishita akí a papia tokante e Konsulta di Kuater Pais i e trabou di rekuperashon ku lo tuma lugá relashoná ku e Aña di Konmemorashon di Pasado di Sklabitut. E minister a bisa ku mas pronto posibel e lo ke bini ku solushon pa e bareranan ku studiantenan ta eksperensiá ora nan kontinuá ku nan estudio na Hulanda Oropeo. Den esaki un preparashon sólido na nos isla mes i un mihó akohida i guia na Hulanda pa e studiantenan lo ofresé mas posibilidat.

Nan a para ampliamente ketu na kalidat di enseñansa, den kua for di aña 2010 ministerio di Enseñansa, Kultura i Siensia a invertí fuertemente. A menshoná tambe e trayekto di traha i siña pa dosente, esta e proyekto Kibrahacha. E ambishon pa fortifikashon di enseñansa i MBO en partikular, tin prioridat haltu serka e minister. Kolegio Ehekutivo ta aploudí e ambishon akí. Ta di gran importansia ku MBO por bai desaroyá su mes mas aleu na Boneiru i amplia e kantidat di ramo di estudio. Den konekshon ku esaki tin e oportunidat pa hasi MBO mas atraktivo regionalmente. Desafionan den esaki ta entre otro alohamentu pa studiantenan lokal, regional òf hulandes oropeo. Si por disponé di un ‘campus’ den futuro, esaki lo ta un posibel solushon pa e problemátika akí, segun Kolegio Ehekutivo. E minister a añadí ku den kaso di ampliashon di ramo di estudio, mester wak bon kiko ta nesesidat riba merkado laboral. 

Aña di Konmemorashon di Pasado di Sklabitut

A wak bèk tambe riba bishita di sekretario di estado Uslu, kaminda a papia tokante e agènda di kultura, maneho di idioma i biblioteka. A ekspresá e deseo serka e minister pa desaroyá biblioteka i hasié un sentro di konosementu kultural inovativo. Ku bista riba e Aña di Konmemorashon di Pasado di Sklabitut a papia tambe tokante e prioridat pa tin mas informashon i medio tokante historia relashoná ku pasado di sklabitut disponibel. Gabinete hulandes ta bini ku un fondo pa e próksimo 10 aña, di manera ku por hasi mas investigashon i material di informashon ta bira disponibel i ku por kompartí mas konosementu, kaminda enseñansa ta bai ehersé un ròl importante.

A papia tambe tokante kon desaroyo di e biblioteka lo duna kontenido spesial na e fondo akí. Segun Kolegio Ehekutivo, informashon i debate tokante pasado di sklabitut tambe mester haña un lugá den e biblioteka nobo, ku mester ta mas ku solamente un sitio kaminda ta fia buki. E deseo ta pa hasié un sentro di konosementu integral kaminda ta organisá tambe tayer i enkuentro pa diskushon tokante temanan riba tereno sosial, pero tambe kaminda ta stimulá investigashon, por ehèmpel tokante pasado di sklabitut.

Banda di esaki minister Dijkgraaf a ekspresá su apresio pa e forma habrí i positivo ku Boneiru a risibí e dispensa ku promé minister Rutte a pidi. E tópikonan tokante di kua nan a papia lo ta un invitashon pa yega na mas kòmbersashon, ‘kaminda prioridat di Kolegio Ehekutivo ta  elaborashon di e trayekto pa finansiamentu di e sentro di konosementu kultural inovativo den forma di e biblioteka’, segun diputado Tjin Asjoe.        

Related posts

Commemoracion di colega morto den servicio active di Defensie Caribisch Gebied

EA News Author

Scucha tur loke tabatin di innovacion den enseñansa diadomingo awo na Telearuba

EA News Author

Aumento di onderstand pa soltero y AWW entrante prome di october 2023

EA News Author

Leave a Comment

Whatsapp Message