Ku orguyo Boneiru a partisipá na e DEMA Show na Orlando, Florida, huntu ku 11 partner for di nos isla pa mustra lo mihó di e sektor di buseo, turismo i hospitalidat.
Un biaha mas e Pavilion Boneiru tabata un éksito i el a atraé hopi interes di profeshonalnan for di e sektor, representantenan di medionan di komunikashon i amantenan di buseo. E aña akí diferente partner tabatin representashon den e Pavilion Boneiru: Bonaire East Coast Diving, Buddy Dive Resort, Captain Don’s Habitat, Chogogo Beach & Dive Resort, Delfins Beach Resort, Dive Friends Bonaire, Divi Flamingo Beach Resort, Grand Windsock Bonaire, Plaza Beach & Dive Resort, Tourism Corporation Bonaire i VIP Diving.
Un di e puntonan kulminante di e evento tabata e Happy Hour boneriano, kaminda bishitantenan ku ta bini bèk i interesadonan nobo sumamente entusiasmá a bini huntu pa deskubrí Boneiru su eksperensianan eksepshonal di buseo.
Un otro éksito tabata e akshon di regalo di ScubaRadio, kaminda e partnernan for di Boneiru a pone premionan fantástiko disponibel ku tabata varia di estadia den risòrt te pakete di buseo. E akshon di regalo a hala hopi atenshon i a engrandesé visibilidat di nos isla i di e partnernan partisipante. Captain Don’s Habitat, Chogogo Beach & Dive Resort, Delfins Beach Resort, Dive Friends Bonaire, Divi Flamingo Beach Resort, Grand Windsock Bonaire, Plaza Beach & Dive Resort i VIP Diving a pone e premionan disponibel.
Boneiru ta kontentu di por anunsiá su partisipashon na e DEMA Show di otro aña, ku ta tuma lugá na New Oleans, Louisiana. Un biaha mas nos isla ta antisipá un evento eksitoso i e oportunidat pa mustra su posibilidatnan di buseo di klase mundial. Nos ta invitá partnernan ku ta interesá pa partisipá na e show di otro aña pa manda un email na crystel.pourier@bonaireisland.com.