BonaireFeaturedInternacional

E Akuerdo Intergubernamental entre Entidat Públiko Boneiru i Estado Hulandes ta eksistí dos aña

Ke 6De Bestuursakkoordoverleg16 Feb 2021

E Akuerdo Intergubernamental entre Entidat Públiko Boneiru i Estado Hulandes ta eksistí dos aña. Na fin di aña 2018 e partnernan a firma e akuerdo ku e ambishon pa fiha un vishon pa término largu pa Boneiru i fortifiká e koperashon ku Reino. E akuerdo ta kontené entre otro palabrashonnan tokante un desaroyo duradero pa futuro pa loke ta trata infrastruktura i mehorashon di kalidat di bida pa pueblo di Boneiru. Relashoná ku e último ei mester pensa riba engrandesementu di siguridat di empleo i redukshon di kosto di bida. Fortifikashon di gobernashon lokal i aparato públiko ta forma base di e akuerdo: un organisashon gubernamental i atministrativo sólido ta nesesario pa awor aki i den futuro enfrentá e retonan di desaroyo na Boneiru i realisá e palabrashonnan ku tin den e akuerdo. Ministerio di Asuntunan Interno i Relashonnan den Reino ta sostené Entidat Públiko Boneiru mas tantu posibel pa yega na un finalisashon eksitoso di e palabrashonnan ku tin den e Akuerdo Intergubernamental, ku tur e desafionan ku esaki ta trese kuné.

Di preparashon pa ehekushon

E durashon total di e Akuerdo Intergubernamental ta kuater aña. Durante e último dos aña hopi kos a pasa, aunke un parti importante di e trabounan te ainda a tuma lugá tras di kòrtina. Mènedjer di programa Danny Rojer ta duna e siguiente splikashon: ‘Den preparashon pa ehekushon di e Akuerdo Intergubernamental e partnernan Entidat Públiko Boneiru i Reino a traha hopi riba análisis di formashon di vishon. Esei ta sòru pa tin un base pa e aserkamentu i finansiamentu i ku awor aki tin e ekspertisio nesesario na nos isla. E dos añanan binidero ta dediká na ehekushon di proyekto.’ A traha duru tambe riba dokumentunan hurídiko manera ordenansa, por ehèmpel riba tereno di konstrukshon di bibienda sosial i akohida pa mucha: esaki ta nesesario pa por kuminsá ku ehekushon.

Den e fase di preparashon a drenta relashon di kolaborashon òf a fortifiká esaki mas aleu ku algun munisipio na Hulanda Oropeo, entre otro Rotterdam, Alphen aan de Rijn i Leiden. E munisipionan aki a pone ekspertisio i kapasidat disponibel pa entre otro maneho di proyekto. Danki na e kolaborashon aki tambe por a kuminsá konkretamente ku algun desaroyo, por ehèmpel renobashon di kaminda. A asfaltá e kamindanan prinsipal pa i rònt di tres skol na nos isla. Tambe a kuminsá ku renobashon di Kaya Carlos A. Nicolaas i na kuminsamentu di e aña aki lo ehekutá renobashon di Kaya Grandi. E pinturanan ta kla kaba. Pa Kaya Amsterdam i Kaya Gob. N. Debrot ta trahando riba e diseñonan, kaminda ta inkluí e desagwe di awa di yobe i un sistema di kloaka. E konstrukshon mester kuminsá meimei di aña 2021.

Ke 6De Bestuursakkoordoverleg16 Feb 2021 Scaled

Related posts

Segun Alfred Burgos di M21: Mester atendé riba término kòrtiku ku entrega defisiente di pòst na Boneiru

EA News Author

Kico ta e significacion di nos fantasia ? (TA DI NOS E TA ? )

EA News Author

James Finies : Teritorio Bonaire a keda finalisa.

EA News Author

Leave a Comment

Whatsapp Message