Ley mester conta pa tur hende, E dilemma di e stepnan electronico na Aruba. E siman aki, un decision di Corte di Husticia den Prome Instancia a lanta un ola di critica y discusion den comunidad di Aruba. Mientras hopi ciudadano ta sinti cu “Aruba ta riba su cabes” pasobra companianan comercial ta uza caminda publico sin permiso y supuestamente sin cumpli cu nan obligacionnan fiscal, Hues a frena Gobierno. Dicon? Pasobra den un Estado de Derecho, structuralmente, un fayo no ta duna derecho na un otro fayo.
E caso di e stepnan electronico di e companianan E-Bike y Green Bike ta saca un herida bieu na cla: e falta di control structural y e forma debil con Gobierno tin biaha ta actua ora mester aplica ley.
E Frustracion Publico: Negoshi riba propiedad di Pueblo
For di un bista comercial y comunitario, e rabia di e pueblo tin tur argumento bálido. E acusacionnan structural contra e companianan aki ta serio:
Uzo di espacio publico: Ta uza acera y caminda publico pa estaciooná y carga stepnan (haci negoshi private) sin un permiso (vergunning) debidamente regla.
Falta di contribucion: E sentimento general ta cu e companianan aki ta genera ganansia grandi den e sector hotelero sin paga e impuestonan (belasting) correspondientes na Land Aruba.
Peliger den trafico: E stepnan ta core sin control riba caminda publico, hopi biaha pa turista cu no conoce regla di trafico local, creando situacionnan di risico.
Den bista di e ciudadano comun, e echo cu Hues a ordena Gobierno pa debolbe e stepnan ta parse un pordon pa coreman cu a bati e sistema legal di e pais.
E Sentencia di Hues: Gobierno no por actua “a la balatriste”
A pesar di e argumentonan di Gobierno cu e stepnan ta un peliger, Hues a duna un les di grupnan di derecho (rechtsstatelijkheid). E sentencia no ta bisa cu e companianan tin rason di ta riba caminda pa semper, sino cu Gobierno mes a cana e caminda robez.
Unda Gobierno a faya
Actua via Social Media: Un “Ultimo Aviso” riba Facebook (29 di April) no ta un procedemento legal oficial pa clausura un negoshi of confisca propiedad.
Falta di un carta oficial (Beschikking): Segun ley, Gobierno mester a manda un carta formal na e companianan, specificando cual ley nan ta violando y duna nan un plaso razonabel (tijdspad) pa nan mes coregui e situacion of retira e stepnan.
No a duna espacio pa defensa: Pa baha confisca den un dia pa otro, sin e procesonan aki, ta wordo considera un actua ilegal di parti di e propio Estado (onrechtmatige overheidsdaad).
Conclusiòn: Un les pa e Gobernantenan
E sentencia aki no ta un victoria definitivo pa e companianan di step, sino un “bula di horea” pa Gobierno di Aruba. Hues tabata hopi cla : e companianan mester atene nan mes na regla y paga locual nan mester paga, pero Gobierno mester duna e ehempel di sigui ley, haci controlnan debido.
Si Gobierno kier saca e stepnan aki for di caminda, e formula ta simpel:
- Manda e cartanan oficial
- Specifica e leynan di control di trafico y uzo di tereno publico.
- Duna e 24 of 48 ora pa kita nan, y si nan no hacié, e ora ey e confiscacion ta 100% legal y e companianan lo no tin ningun base pa gana den Corte.
Aruba no por biba den un anarquia unda companianan ta haci loke nan kier, pero tampoco den un pais unda Minister- nan ta actua sin respeta e propio leynan cu nan mes a traha. Awor e bala ta den tereno di Gobierno pa haci e trabou di e forma habri, husto y legal y manda e mensha cla cu na Auba tur compania cu kier haci negoshi mester haci esaki conforme e ley nan di Aruba.