Durante un consulta awe mainta entre e sindicatonan y representantenan di e fraccion MEP a constata cu hopi preocupacion cu e gobierno arubano AVP-Futuro y nan fraccionnan di coalicion no a tene niun consulta ainda cu e sindicatonan riba e proposito Ley di Reino HOFA. Esaki a pesar cu e sindicatonan aki a entrega un ‘position paper’ y ta representa miles di trahado den sectornan crusial di e pais.
E sindicatonan a enfatisa cu nan no a wordo invita ni scucha ni pa e gobierno ni pa e gruponan di coalicion. E falta di dialogo aki ta mustra despresio pa e partnership social cu a ser construi cu hopi esfuerso durante añanan.
E sindicatonan ta adverti cu e ley aki ta un violacion directo di e autonomia di Aruba y e decision di e pueblo di Aruba. Un ley asina lo pone e control final riba nos finanzas den man di Hulanda, un situacion cu segun e sindicatonan ta incompatibel cu autogobernashon y responsabilidad democratico.
E sindicatonan a indica cu Aruba tin un supervision financiero basa riba un regulacion nacional pa hopi aña caba, y cu e ta funcciona bon. “Si un remedi ta traha, pakico purba un otro? Si e regulacion nacional por wordo mehora , adapt’e, pero no remplas’é cu un ley nacional cu ta limita nos derechonan,” asina un di e representantenan di e sindicato a bisa.
Ademas, durante e discusion a nota cu e acuerdo administrativo cu ta antecede e ley di Rijkswet no ta obligatorio, y cu segun declarashonnan den e Estadonan di Aruba, Hulanda ta keda cu e ultimo palabra. E sindicatonan ta rechasa firmemente e principio aki, pasobra e ta subordona e voto di e ciudadanonan Arubano na desicionnan externo.
E sindicatonan ta tuma e decision cu un mensahe cla: “Autonomia di Aruba no ta negociabel. Nos ta exigi cu gobierno y parlamento scucha e hendenan cu ta contribui tur dia na e economia di e pais aki.”
Press release: MEP
