Durante e bishita di trabou di Kolegio Ehekutivo di Boneiru na Hulanda a tene vários kòmbersashon ku e diferente ministerionan. Deliberashon a tuma lugá ku entre otro minister Jetten di Asuntunan Ekonómiko i Klima (EZK), kaminda e petishon pa supsidio ku WEB Bonaire a entregá dos aña pasá pa gradualmente pasa over pa produkshon di energia sostenibel, tabata e punto di agènda mas prinsipal.
E minister a indiká ku e trayekto ta den su fase final pa pone sèn èkstra disponibel. A papia tambe seriamente tokante e posibilidat pa pone panel solar riba e kasnan di hür social, kaminda a pone atenshon riba dispensashon pa derechi di importashon di panel solar i piesa tambe. A papia tambe tokante e posibilidat pa transporte públiko di koriente na Boneiru.
Kolaborashon
Durante e konsulta ku e minister e delegashon di Kolegio Ehekutivo, konsistiendo di gezaghèber Edison Rijna, e diputadonan James Kroon, Hennyson Thielman, Nina den Heyer i sekretario insular Wendy Pelk a hasi uso di e oportunidat tambe pa trese algun punto di preokupashon dilanti tokante e kolaborashon ku e ministerio. Entidat Públiko Boneiru por ehèmpel ta deseá pa risibí informashon mas tempran tokante e akshonnan i proyektonan ku Hulanda ta ehekutá na nos isla. Tin ora nan ta ehekutá proyekto ku nan no a informá gobièrnu di Boneiru tokante di nan i kaminda den sierto kasonan no tin nesesidat pa esakinan.
Banda di esaki segun Kolegio Ehekutivo mester wak e posibilidatnan pa supsidio i finansiamentu pa e empresarionan na nos isla den un forma mas aktivo. Via ‘Rijksdienst voor Ondernemend Nederland – Servisio di Reino pa Hulanda Empresarial’ tin supsidio i areglo disponibel pa empresarionan na Boneiru, pero ta resultá ku pa loke ta trata e ehekushon berdadero nan no ta funshoná na nos isla. Kolegio Ehekutivo ta insistí pa wak e resultadonan i adaptá e ehekushon di tal forma ku berdaderamente empresarionan lokal por hasi uso di nan.