Den oranan di anochi laat, Parlamento di Aruba a aproba e Presupuesto 2026 di Pais Aruba. Sinembargo, fraccion di Partido Patriótico Arubano (PPA) no a duna su apoyo na e presupuesto.
Segun PPA, nan decision ta basá riba e hecho cu Gobierno no a contesta preguntanan crucial presentá por e fraccion, loke a crea falta di claridad y transparencia riba e uso di fondo publico y e placa di belasting pagá door di ciudadano. PPA a indica cu sin e informacion necesario, nan no por sostene un presupuesto cu afecta directamente e pueblo.
No obstante, fraccion di PPA a reconosé cu, for di vista tecnico, e Presupuesto 2026 ta cumpli cu e ley di LAFT, ta mustra un surplus atrobe e aña aki, cu norm ta riba 1%, y cu e sector colectivo ta den un estado financiero saludabel. Segun PPA, e cifranan ta indica cu Aruba ta den un bon caminda economico.
Basá riba e evaluacion aki, PPA inicialmente tabata dispuesto pa sostene e presupuesto. Sinembargo, nan postura a cambia despues cu Gobierno a introduci un cambio den e ultimo momento, loke PPA a califica como un acto di malicia.
Lider di fraccion PPA, parlamentario Eduard Pieters, a declara cu Gobierno di AVP–FUTURO a presenta un cambio cu ignora y rechasa decicionnan aproba previamente door di Parlamento, entre otro e Ley di LIM, cu establece e structura di carteranan di Pais Aruba y cu a haya amplio apoyo parlamentario.
Ademas, Pieters a indica cu e cambio tambe a laga un banda un amienda presenta door di parlamentario Mike de Meza, un propuesta describí como historico pa promové igualdad dentro di Reino Hulandes. Segun PPA, e manera cu Gobierno a introduci e cambio den e ultimo momento, a sido “sin consulta ni control parlamentario”.
PPA ta considera e accionnan di Gobierno AVP–FUTURO como un falta di respeto no solamente pa Parlamento, pero tambe pa pueblo di Aruba. Fraccion di PPA a recalca cu nan no ta acepta practicanan cu pone decisionnan democratico un banda y cu afecta e transparencia di gobernacion.
Gobierno di AVP –FUTURO ta bin cu un nota di cambio manera un djaca den anochi , “un sluwe vos “ ta hala e LIM un banda pa como gobierno haci loke nan kier y caminda cu placa di pueblo ta hunga un rol aki.