Minister di Finansa Xiomara Maduro: E logro pa elimina atraso na departamento di impuesto ta na beneficio di un y tur

Danki na e trabao y esfuersonan di gerencia y empleadonan di e departamento

Pa hopi tempo den comunidad por a scucha e critica cu na Departamento di Impuesto tin atraso den procesamento di cobransa di inkomstenbelasting y primanan social, y pago di restitucion. Banda di e demas responsabilidadnan cu e mandatario y e departamento aki tin pa cumpli cune, Minister di Finansa y Departamento di Impuesto a bin ta atende e punto di preocupacion aki y asina a traha y e departamento a bini cu un plan di accion pa elimina e retraso aki. 

E plan di accion aki a wordo ehecuta y a duna como resultado cu a yega asina leu cu na aña 2023, e departamento di impuesto ta logra un otro milestone importante di Pais Aruba. Despues di mas cu 40 aña, e departamento ta elimina e atraso den procesamento di cobransa di inkomstenbelasting y primanan social manera AOV/AWW y AZV, cual a sosode den luna di mei 2023. Otro logro importante di Departamento di Impuesto ta cu ta pagando restitucion. Durante aña 2022 a logra paga un total di 27,9 miyon florin y 7,9 miyon florin den e prome kwartaal di aña 2023 na restitucion.

Minister di Finansa ta gradici gerencia y tur esnan di e departamento pa e gran logro aki cual ta na benefico di nos pueblo y e departamento. Ademas e mandatario ta desea e departamento hopi exito pa nan por sigui cumpli cu e reto y trabaonan diario.