Dialuna ultimo, Aruba tabata cas pa e tres titularnan di Educacion di Aruba, Boneiro y Corsou cu a firma un acuerdo di continuacion pa cooperacion historico enfoca riba nos idioma comun: Papiamento.
Presente durante e firmamento hunto Minister di Educacion di Aruba sra. mr. Gerlien Croes, tabata colega Minister di Enseñansa di Corsou sr. Sithree (Cey) van Heydoorn; y Diputado di Boneiro sra. Nina den Heyer. Hunto, nan a reafirma nan compromiso pa traha man den man riba material didactico, metodo di enseñansa, formacion y profesionalisacion pa maestronan, investigacion linguistico y promocion di uso corecto di Papiamento tanto na scol y den comunidad.
Minister Gerlien Croes a mustra cu e momento ta sumamente importante pa identidad y progreso educacional di e region: “Nos ta asumi un compromiso firme pa inverti tempo, energia y recurso den cooperacion cu reino, pa fortalece nos idioma Papiamento. Minister Gerlien Croes a subraya. Esaki no obstante cualkier sea e maneho di idioma cu cada isla ta escohe pa hiba den educacion.
Minister Gerlien Croes a gradici tur e funcionarionan, ekiponan tecnico y profesionalnan di educacion cu ta coopera, specialmente considerando cu Papiamento ta den presion continuo di otro idiomanan.
Minister ta pone enfasis riba un educacion inclusivo cu por crea cuidadanonan multilingual pero na mes momento ta reconoce e importancia pa sigura cu nos comunidad ta siña y ta forma parti den su propio idioma.
E paso firma awe ta e prome, pero sigur no e ultimo: un grupo di trabou lo sigui cu implementacion di e acuerdo, intercambio di material y un agenda pa profesionalisacion continuo.
