Durante e Reunion Publico di ayera riba e Rijkswet HOFA, cu fraccion di PPA a pidi pa sosode for di 30 di januari, parlamentario Eduard Pieters di Partido Patriotico Arubano (PPA) a lansa un preocupacion fuerte y directo. “Como miembro di Parlamento, mi ta pidi un punto di ordo, pero no ta wordo honra. Esaki ta un biaha mas muestra cla di falta di democracia parlamentario cu ta reina na Aruba. Pieters a inicia ta recorda cu ta for 30 di januari, fraccion di PPA a solicita formalmente un reunion pa trata unicamente e trayecto di un Rijkswet. Pero loke ta falta di respet ta cu basa riba articulo 23 inciso 4 di Reglamento di Ordo, ta stipula cu na momento cu un parlamentario conhuntamente cu otro colega di Parlamento, pidi pa un tipo di reunion asina, esaki mester tuma lugar dentro di 30 dia y no 7 luna despues.
Un Gobierno cu a opta pa cera oido total pa su pueblo:
Segun parlamentario Pieters, Gobierno di Aruba a scoge pa manda e concepto di ley di HOFA pa Hulanda, excluyendo tur e condicionnan y debate cu nan mes a defende na IPKO den 2022.
“Nos no por comprende con Aruba mes no a yega na e consenso, prome cu a dicidi di manda e concepto Hulanda. E proceso no tin transparencia, ni respet pa pueblo,” el a agrega.
Parlamentario Pieters a referi na e union di e sindicatonan y gremionan comercial, unda nan ta urgi Parlamento di Aruba pa refleha, cu dignidad y patriotismo, riba e yamada di bos di nan representantenan, esta pueblo en general. Con por ta posibel cu Parlamento, cu ta e cas y bos di pueblo, no ta haya e respet y oido debido pa un topico cu ta concerni nos tur?
HOFA: Un menasa directo pa nos autonomia:
Den Eduard su discurso, el a enfatisa e rechaso total di Rijkswet HOFA, cu ta un instrumento huridico, cu ta mina nos autonomia financiero y constitucional. “Ta un ley di Reino cu ta duna Conseho di Reino poder pa interveni den asunto financiero interno di Aruba. Esaki ta entrega nos soberania pa un sac’i placa,” el a enfatisa.
El a recorda cu nos derecho constitucional y financiero ta wordo comprometi pa e condicionnan imponi pa Hulanda, cu no tin base den nos Staatsregeling.
“E ley ta impugna cu nos constitucion y ta pone duda riba e legitimidad di nos autonomia. Mi ta para awe pa defende e lucha di nos prome lider politiconan; Juancho Irausquin, Shon A. Eman, Betico Croes, Henny Eman y Nelson Oduber, cu a traha pa e frase: ‘Pa ta baas den nos mes cas’.”
Un mensahe cla: PPA ta defende Aruba
“Nos autonomia no ta na benta, ni pa entrega. PPA ta para firme pa defende e derecho constitucional di Aruba,” Pieters a conclui. Den un Parlamento unda miedo y silencio ta domina, PPA lo ta e bos di resistencia y patriotismo. “Mi ta para aki pa Aruba, pa defende nos constitucion, nos Statuto di Reino y mas cu tur cos e dignidad y lucha di nos pueblo.”
Press release: Partido Patriotico Arubano (PPA)
