Durante su rueda di prensa di diahuebs, parlamentario Eduard Pieters di fraccion di PPA a trece
un mensahe contundente y critico riba e celebracion di 40 Aña di Status Aparte. Segun Pieters,
Aruba no por permiti cu un logro historico di tanto sacrificio ta reduci na bunita ceremonia,
discurso elocuente y simbolismo bashi, mientras e decisionnan actual ta pone e autonomia mes
na peliger.
Palabra bunita vs. accion real
Durante e celebracionnan reciente, desde Plaza Betico Croes te na Universidad di Aruba, varios
discurso a resalta e gran importancia pa nos mantene Status Aparte. Minister Gerlien Croes, por
ehempel, a enfatisa cu “e lucha di pasado ta defini nos decisionnan awe y futuro” y “cu nos
mester ta orguyoso di loke nos tin como Arubiano”.
Pero Pieters a cuestiona e coherencia entre palabra y accion. “Con uno por papia di mantene
Status Aparte,” el a cuestiona, “mientras simultaneamente bo ta sostene iniciativa legal, cu ta
mina nos autonomia?” Pa PPA, e peliger ta den e contradiccion: celebra independencia politico
den palabra, pero acepta e structuranan cu por limita e autoridad di Aruba den practica,
specialmente ora ta trata di e ‘budgetrecht’ di Parlamento.
Un lucha di mas cu 70 aña
Pieters a recorda cu e lucha pa Status Aparte no a cuminsa na 1986, sino mas di 70 aña pasa.
Pieter ta corda pueblo di e rapport di Van Poelie y Interimregeling, caminda defunto Juancho
Irausquin a purba evita cu Aruba perde su posicion igual dentro di Antias. Ora cu mayoria
politico na Corsou y defunto Henny Eman a scoge pa e “interimregeling”, Irausquin a adverti cu
e rumbo ey lo debilita igualdad entre e islanan. Desde e momento ey, Irausquin a lanta PPA y e
lucha pa separacion y autodeterminacion a bira inevitabel.
Status Aparte, pues, no ta un regalo historico, ta un resultado di sacrificio, vision politico y
determinacion di e generacionnan cu a bin prome. Ignora e peso historico aki ta, segun Pieters,
ta un falta di respet pa e legado di nos baluartenan politico.
Rijkswet y e riesgo pa autonomia
E preocupacion central di PPA ta e apoyo firme pa Rijkswet, cu segun Pieters, por mina e base di
nos autonomia. El a bisa claramente cu no por celebra 40 aña di Status Aparte den un forma
“superficial y cosmetico”, mientras e decisionnan strategico ta reduci e espacio di decision
local.
“Nos no por claba un cuchiu den lomba di pueblo,” Pieters a declara, señalando cu minister
Croes y Wever ta kere cu e direccion di Rijkswet ruba supervision financiero ta e mihor
caminda, sin compronde completamente e implicacionnan. “E cantidad di aña di lucha ta hopi
mas aña di e edad di minister Croes y Wever” Pieters a declara. P'esey ta hopi importante pa
nan por compronde kico e lucha ta nifica pa Aruba. Autonomia no ta un asunto di minoria; ta un
derecho colectivo cu nos a gana tras hopi lucha.
Finalmente Pieters ta haci un yamada pa reflexion serio. Pero pa esaki Ministernan Croes y
Wever mester compronde kico e lucha a nifica y kico Status Aparte ta pa.Aruba y djey nan
mester tuma accion responsabel. Parlamento mester para firme, e fraccionnan mester uni
hunto cu e gremionan y presenta un frente nacional cla: Aruba ta habri pa cooperacion den
Reino, pero no pa e condicionnan cu ta mina su autonomia.
Aruba a demostra cu por maneha su finansa cu disciplina y incluso genera surplus. E pais tin
capacidad pa dirigi su propio futuro. Celebracion di Status Aparte mester bay mas leu cu
ceremonia, mester traduci den liderazgo, proteccion di nos derecho constitucional y un
compromiso real cu e lucha sagrado cu a forma nos pais.