Parlamentario Eduard Pieters a bishita Cura Cabay pa sinta cu e amigonan di Centro di Pesca
Cura Cabay, un proyecto cu mas di 10 aña pasa a mustra vision, cultura y desaroyo economico
local. Loke a cuminsa na 2016 bou liderazgo di ex-minister Otmar Oduber tabata un inversion
den nos identidad maritimo: un espacio digno pa e piscadornan, un pier renoba y amplia na
2018 bou di mesun ex-minister Oduber y un vision pa conecta piscamento cu turismo. Awe, e
realidad ta mescla cu orguyo y preocupacion serio.
Un proyecto manteni cu nan propio placa
Eduard a indica cu: “Centro di Pesca Cura Cabay ta mas cu un structura fisico. Ta un punto di
encuentro cultural, unda e piscadornan por sinta prome of despues di bay lama, warda nan
ekipo y pasa un momento comunitario. Durante aña, e propio piscadornan mes ta paga
mantencion for di nan propio saco pa reparacion di e luznan, mantencion basico y cuido di e
pier”.
Pero amor pa tradicion no por reemplaza responsabilidad di gobierno. E boltsnan mester
mantencion tecnico. E iluminacion ta crucial pa siguridad, ora nan drenta of sali mainta
trempan of anochi. “E vision original tabata cu e espacio por evoluciona tambe den un niche
economico: si e piscadornan haya e huurgrond y edificio bandona banda pabou, nan por bende
pisca fresco directo, specialmente cu e turistanan di p.e. Hotel Secrets, cu a habri su portanan
caba na San Nicolas. Esaki lo ta un experiencia autentico, local, cu por genera entrada pa e
Centro di Pesca mes y comunidad. Pero e potencial aki ta core riesgo.”
Contaminacion cu no por ignora
Un di e tankinan cu tin sludge tin un scheur. Resultado? Petroleo ta lek y ta drenta den lama. E
piedranan blanco cu a pone pa embeyece e lugar awor ta preto preto. E bahia ta mustra señal
cla di contaminacion. E piscadornan a mustra e situacion preocupante cu prueba cla: algun an̈a
pasa nan a haya piscanan morto ta drief den awa, lodo acumulando y mata straño naciendo na
rand di pier.
Unda ta e accion ambiental? Unda inspeccion tecnico ta? Unda intervencion inmediato ta?
Segun Eduard: “E tanki aki no ta solamente un defecto structural. Ta un riesgo pa medio
ambiente, pa economia local y pa salubridad publico. Fraccion di PPA ta haci un apelacion cla:
gobierno mester interveni urgentemente pa stop e lekmento di petroleo y protega e bahia”.
RWZI y maneho incoherente
Banda di esey, tin cuestion serio riba e maneho di pasado di RWZI. Capacidad limita cu a wordo
sobrepasa pa basta tenpo cu demasiado truck di chica pos. Resultado? Awa sushi mester wordo
descarga di algun forma. Y e sospecha ta, cu parti di e descarga aki ta yega den e bahia di
Zeewijk. E efecto visual ta alarmante: acumulacion di lodo na varios caminda y na rampa di pier.
E rampa ta casi inoperabel, ora lodo acumula. P’esey fraccion di PPA ta urgi gobierno pa manda
excavator limpia e zona (“dredging”), pa e piscadornan por subi y baha nan boto cu siguridad.
Habri e boca: solucion practico cu ta warda accion
Finalmente, un medida simpel cu por duna alivio inmediato: habri e boca atrobe.
Actualmente, e piscadornan mester nabega 30 minuut pa drenta y 30 minuut pa sali. Esaki ta
costa nan un tanki di gasoline extra cada biaha. E boca tabata habri caba. E peticion di e
piscadornan ta rasonabel: bolbe habrie pa spaar tempo, placa y combustibel.
“Cura Cabay ta simbolo di resiliencia cultural. Pero amor pa tradicion no por substitui
gobernacion responsabel. Nos no por celebra piscamento como patrimonio y na mesun
momento laga contaminacion destrui su base. Nos no por papia di economia primario, mientras
infrastructura ta deteriora,” Eduard a vocifera.
Gobierno mester interveni awor, protega medio ambiente, sostene e piscadornan y honra un
proyecto cu a demostra balor real pa Aruba.
