PoliticaFeatured

Parlamentario Marco Berlis (MEP): Pasa tempo cu nos yiunan ta garantisa un fundeshi y un comunidad fuerte

Parlamentario Marco Berlis

Nos yiunan ta nos responsabilidad principal, esaki sigur no ta di e maestro di scol!

For di basta aña caba nos ta biba den un sociedad unda cu den mayoria caso ambos mayornan ta traha pa e bienestar di nan hogar. Esaki sigur ta trece retonan grandi cu ne. E ta haci cu mayornan mester traha duro y tin biaha ta traha mas cu un trabao pa por yuda e hogar bay dilanti. Esaki na su turno ta trece otro dilema cu ne; “scarcedad di tempo.” Pa mayoria di hogarnan e dia ta cuminsa alrededor di 5’or di mainta pa prepara e muchanan bay scol y e mayornan pa bay trabao. Mayornan ta yega laat den atardi, of hasta anochi di trabao tur cansa. Esaki ta haci cu hopi biaha mayornan no ta atende ni ta sinti e motivacion pa dialoga y pasa tempo cu nan yiunan. 

Di parti di e yiunan, e cel y tablet a bira manera un adiccion, y si no ta controla esaki di un manera sano, tur atencion den famia ta wordo menasa di termina. Sin menciona e diferente peligernan cu ta existi riba internet pa nos yiunan y na cual nan ta wordo exponi diariamente. Ta pesey mi ta kere manera un mayor mi mes, cu nos mester ta mas intencional y disciplina cu nos tempo. Esaki ta rekeri un planificacion adecuado den y como famia, propone y pone metanan concreto pa tur cos. Traha tempo pa practica hobbies hunto, recrea hunto, dialoga na mesa riba diferente topiconan manera scol, salud, prevencion di droga, educacion sexual, y naturalmente tambe dialoga pa sigui crece y conecta cu otro den amor. Nos yiunan ta nos responsabilidad principal, esaki sigur no ta di e maestro di scol. Pesey e ta bon pa nos corda cu pone pan riba mesa no ta e unico cos cu un bon mayor ta haci. E ta hopi mas cu djis esey.

Como mayor e ta importante nos siña muchanan respet, etica, moralidad, balornan halto, identidad, e importancia di actividadnan fisico, proposito den bida y mucho mas. Ora nos yiunan ta chikito e ta mas simpel pa guianan. Pa ora nan ta grandi ya nan custumbernan ta forma caba pa medio di nos ehempel, guia y e cultura cu nos a forma den nos hogar. Cual ta e cualidadnan cu nos kier wak inculca den nos yiunan? Cual ta e cultura y etica cu nos kier pa nan demostra? Con nos kier cu nan lo recorda nos? Di ki manera nos ta desea pa nan impacta y contribui na nos comunidad? Como mayornan, nos ehempel y dedicacion na nos yiunan por determina esaki. Nos mester ta dispuesto como mayornan pa haci e sacrificio y planifica nos tempo, pasobra nos tur sa con liher nos yiunan ta crece bay laga nos.

Ademas, cria y educa nos yiunan ta un privilegio. E bienestar, seguridad y progreso di nos pais ta wordo dicidi den gran parti den e calidad di tempo y guia cu nos ta duna den nos hogar. Laga nos no ta negligente den esaki y compronde e importancia pa ta un bon mayor. 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper, sin nada di sconde!

Related posts

Rudy Lampe (RED) : Presidente di SIMAR a core un campaña enbes di mira bienestar di su docentenan

EA News Author

SVb Aruba ta normalisa tur orario y procedura adapta y notifcacion AO y yamada pa consulta medico

EA News Author

Minister Maduro di Finansa ta informa: Un biaha mas Standard and Poor’s ta confirma e ‘Investment Grade Rating’ di Aruba

EA News Author

Leave a Comment

Whatsapp Message