Mirando e desaroyonan di e oumento di sifranan pa ku vírùs di COVID19 ta importante pa hasi esaki mas transparente posibel pa evitá antagonismo riba e personanan ku ta infektá. Ya pa algun tempu kaba mi ta bin ta urgi na gobièrnu pa indiká kuantu di e persona ku ta infektá ku e vírùs di COVID19 ta residente i kuantu no ta residente. Meta di esaki ta pan evita konfushon i trese un poko mas trankilidat den nos komunidat i pa tambe duna indikashon kon safe e PCR test ku personan ku ke bini nos pais tin ku hasi ta òf no. Awe lamentablemente pueblo ta konfundí i otronan ta hasi mal uso di e situashon dor bisa ku ta e turistanan ta fuente di COVID19 aki na Kòrsou sin ku esaki ta basa riba fact/data. Hasiendo esaki e lo no trese ningun violashon di niun lei ni tampoko privasidat di niun hende mirando ku na Aruba for dia a habri frontera a hasi esaki. Ta hopi importante pa indiká sigur mirando ku tin intenshon pa sigui habri pa mas turista di otro paisnan por bin bishitá nos pais pa yuda nos Ekonomia i krea kupo di trabou.
Mirando e temporada delikado ku nos ta den, Gobièrnu mester duna informashonnan ku sigur lo ta di importansia pa trese trankilidat i desmentí rumornan falsu ku ta sirkulá enkuanto di e kontagio di COVID19 den nos pais. Mc William ta spera ku Gobièrnu duna oido na su preokupashon i traha riba esaki mas rápido posibel mirando e konfushon ku ta reina awor aki.
