Durante e reunion publico cu Minister Wendrick Cicilia, parlamentario Xiomara Maduro a cuestiona e decision di uza fondo di Aruba Tourism Authority (ATA) pa paga un compania priva pa procesa sushi.
Transparencia den gasto di placa di pueblo
Segun Maduro, e discusion no tabata solamente riba sushi, sino riba con Gobierno ta gasta placa di pueblo. El a enfatisa cu tur ciudadano cu ta paga belasting tin derecho di sa con su placa ta wordo uza. “Nos no ta pidi milagro. Nos ta pidi pa cada florin wordo gasta cu logica, transparencia y responsabilidad,” Maduro a declara.
Maduro a aclara cu su preguntanan no tabata dirigi riba e funcionamento interno di Serlimar, ni riba cua minister ta responsabel pa recoge sushi. Pa e parlamentario, e pregunta principal tabata: dicon ATA, un entidad cu ta depende di e Ministerio di Turismo, ta paga un contrato pa haci limpiesa na Aruba.
E parlamentario a recorda cu Aruba ya caba tin un empresa di gobierno, Serlimar, cu tin como tarea pa maneha desperdicio. Ademas, Serlimar ya ta paga e mesun compania priva pa procesa parti di e sushi, y awor ATA tambe ta paga e mesun compania pa e mesun trabou.
Pa haci su punto mas cla, e parlamentario a duna un ehempel simpel: si un hende ta paga un persona pa haci su cas limpi, y despues e mester paga un di dos persona pa bin haci e mesun trabou, naturalmente e lo puntra dicon e mester paga dos biaha pa e mesun trabou.
Durante su intervencion, Maduro a haci varios pregunta na e minister:
Confirma si e contrato aki ta wordo paga cu fondo di ATA.
Splica dicon a scoge pa uza placa destina pa turismo en bes di a amplia e e servicionan di Serlimar.
Clarifica si Gobierno a compara e costonan prome cu a firma e contrato.
Detaya kico ta e diferencia entre e proyecto nobo aki y e programa “Baki den Bario”, considerando cu Gobierno ya a inverti hopi placa den e iniciativa anterior.
Falta di LIM nobo ta crea confusion
Un otro punto cu Maduro a menciona tabata cu Aruba ainda no tin un Landsverordening Instelling Ministeries (LIM) nobo. Segun Maduro, esey ta crea confusion riba cual minister ta responsabel pa cual tarea. Sinembargo, el a enfatisa cu e decision pa uza fondo di ATA ta cay bou di Ministerio di Turismo, y p’esey e minister mester duna aclaracion.
Maduro tambe a pidi mas informacion riba e futuro di Serlimar. E kier sa si Gobierno ta fortalece e empresa di gobierno of si cada biaha ta bay depende mas di companianan priva pa procesa desperdicio na Aruba. Maduro a pidi tambe dato riba cuanto placa publico a wordo paga na companianan priva pa e trabou di procesa sushi.
Conclusion
Na final di su discurso, Maduro a bisa cu su cuestionamento no ta contra e empresa priva. Segun Maduro, e empresa priva tin un rol importante den economia di Aruba, pero Gobierno tin e obligacion di mustra cu cada florin di pueblo ta wordo gasta cu responsabilidad.
“Pueblo no ta pidiendo un milagro. Pueblo ta pidi pa su placa wordo gasta cu respet, cu un plan cla y cu responsabilidad. Pa esey Parlamento tin e deber di haci e preguntanan aki,” Maduro a conclui.