Den reunion di Parlamento di dia 28 di october, Parlamento a trata e reglamento di ordo nobo di Conseho di Minister. Den e reunion aki Paralamentario Marisol Lopez – Tromp a hiba palabra como prome y den loke cu expertonan ta considera eror di principiante, por a nota cu Marisol a hinca su mes den problema.
Durante di su prome tanda, e Parlamentario a cuestiona Minister President Evelyn Wever – Croes pa e forma cu el a wordo kita for di trabou e tempo ey pa e hecho cu e no por a finalisa su trabou ni traha un inventarisacion di su trabounan, pasobra el a wordo retira inmediatamente.
Prome Minister na su turno a splica con e proceso di su retiro a bay:
Sra. Marisol Lopez – Tromp tabatin reunionnan dificil den Parlamento den cual a trata mocionnan di desconfiansa contra su persona, despues cu su fracccion di POR a bisa cu nan no tin confiansa mas den dje. E situacion aki a causa cu Gobernacion a tranca, pa cual Minister President a yama sra. Lopez – Tromp tres dia tras di otro pa papia riba e problema y con ta sali for di dje pasobra na e momento ey Aruba tabata memey di crisis y Gobernacion no por keda tranca.
Minister President a splica enfaticamente cu a yama sra. Lopez – Tromp mainta, merdia, atardi y anochi di dialuna pa diaranson, sinembargo sra. Lopez – Tromp no kier a duna cara riba e impase cu tabatin den Gobernacion y Parlamento. Consecuentemente, no a keda Minister President nada mas eorey cu retira sra. Lopez – Tromp pasobra obviamente no por traha cu ne mas.
E retiro aki a cana su caminda constitucional corecto, el a bay Gobernador y Parlamento y ricibi sosten di e mayoria (fraccion MEP, POR y RED). Di e forma aki a formalisa e retiro di sra. Lopez – Tromp. Pa su mayan el a haya Landsbesluit di su retiro y su acceso na Bestuurskantoor a wordo kita. Locual cu tabata remarcabel cual Minister President a splica ta, cu hustamente pa por tabatin un traspaso debido, e tabata yama sra. Lopez – Tromp tres dia largo pa regla un bon traspaso. Kiermen ta hopi particular cu awor e ta bisa cu e no a haya chens.
Ekiponan di Gobierno cu no a entrega
Locual cu mas a hala atencion ta ora cu Minister President a bisa sra. Lopez -Tromp cu el a bay cu ekipo di Gobierno, entre otro Macbook, Ipad y accesorionan di laptop y no kier trecenan bek. Secretariaat di Ministerraad a mande hopi carta pa recorde di esaki, cartanan cu el a firma cu el a ricibi y asina mes e no tabatin e desencia di contesta e cartanan. Riba dje Minister Geoffrey Wever cu aworaki tin e cartera di Infrastructura, tambe a manda Marisol Lopez – Tromp pa pidie pa e mesun ekiponan aki y ainda sra. Lopez Tromp no a duna ningun splicacion. Esey Minister President a recorde den Parlamento y bise pa e entreganan mas pronto cu ta posibel y sino lo entrega keho di ladronicia.
Sra. Lopez – Tromp a bisa cu e no tin e ekiponan, pero Premier a recorde cu e responsabilidad pa e ekiponan ta di dje e tempo ey como Minister. E ekiponan ta registra na e Ministerio cu e tabata maneha pues e responsabilidad ta di dje. Si e no tin nan e mester splica na ken el a duna nan pasobra sino esaki ta ladronicia.
Eror di principiante
Prome cu finalisa mester remarca cu masha poco bo ta mira sra. Lopez – Tromp ta comete erornan di principiante di e forma aki hincando su mes den problema. Pasobra, si e no a trece e tema aki dilanti, Premier no mester a recorde den Parlamento cu un aña largo e tin ekipo di Gobierno na su cas sin cu e ta entrega nan.
Dicon sra. Lopez – Tromp a comete un eror di principiante? Marisol ta un politico cu hopi experiencia y expertonan ta analisa cu akinan ta e envidia y rabia cu e tin riba Prome Minister a pone comete eror di principante. Ta un ‘secreto publico’ cu sra. Lopez – Tromp tin un rabia enorme cu ta visibel cada biaha cu e papia riba Prome Minister Wever – Croes. E ta obvio cu e tin un odio y ta e odio aki ta loke a ciege y lage comete e eror di prinicpiante. Awo e ta na sra. Lopez – Tromp pa haci lo corecto, entrega e ekiponan di Gobierno, sino ta bin cu keho contra dje di ladronisia, Premier Wever – Croes a enfatisa.