Bijbel ta adverti masha hopi biaha tocante di fierno, y Hesus mes ta menciona fierno pa mas cu 70 biaha.
Fierno ta un lugar di tormento eterno, caminda esnan cu no ta kere y ta rechasa Hesus Cristo ta bay para, pasobra bijbel ta bisa nan lo bay perdi, pasobra esun cu drenta fierno ta pa eternidad.
Ta pornada ta haci oracion pa un hende cu ta den fierno, tur oracion pa hende drecha nan bida mester wordo haci pa nan salbacion ora nan ta na bida, pasobra ora hende muri, aunke cuanto oracion hende haci pa defunto nada no por wordo ahusta.
Pa un hende sosega na pas, e mester muri den Cristo, cu su salbacion cu e a ricibi pa medio di Cristo Hesus, pasobra no tin ningun otro nomber por lo cual un hende por wordo salba.(1 Thesalonisenses 4:13-18).
Ta hopi tin ta chercha, haci wega, haci bofon, cu nan no tin mester di Dios, tin hopi hende cu kier sigi biba den maldad y inmoralidad, manera nan por gaña Dios, pero un cos nos tin sigur Dios sa ta ken ta esnan cu ta di dj’E.
Miedo di fierno no ta salba ningun hende, kere y biba pa Cristo Hesus esey ta nos salbacion.
Palabra di Dios ta bisa: Si nos confesa nos pica, Dios ta fiel y husto pa pordona , nos , nos picanan y libra nos di tur inhusticia.
Hende ta bay fierno pa motibo cu nan a rechasa of neglisha e Yui unigenito di Dios.
Lucas 16:23 ta para scirbi cu fierno ta un lugar di tormento,caminda no tin salimento mas, no tin oracion pa saca hende for di fierno hiba cielo. Bijbel no ta papia absolutamente nada di esey.
Pesey Hesus ta bisa den Marco 9:43 si bo man ta ponebo trompica , corte kita afo, mihor bo drenta bida eterna mancaron, cu bo drenta fierno cu tur dos man.
Lo yega e dia cu nos tur tin cu duna cuenta dilanti di Dios, si tur hende mester duna cuenta na Dios di nan obranan haci aki riba mundo.Y ta dos lugar tin: sea bida eterno den cielo, of morto eterno den e lago di candela , cual ta e di dos morto, ( Revelacion 20:14).
Si un hende su nomber no a wordo haña scirbi den e buki di bida, e a wordo tira den e lago di candela.
Ora nos papia cu un hende pa entrega su bida na Cristo y sali for di e mundo di scuridad, hopi ta bisa bo pa bo no huzga y hasta usa e frase “Biba laga Biba”.
Pero ora nos corda cu Cristo Hesus a siña nos pa stima nos prohimo, nos ta sigi haci esfuerso, pa e persona por entrega su bida na Cristo, pasobra esey ta e mandato di nos Señor,pasobra fierno ta real.
E palabra di Dios ta bisa pa nos bay den henter mundo y haci tur hende disipulo di Cristo.Pasobra ta boluntad di Dios pa ningun bay perdi , pero pa tur yega na arepentimento. ( 2 Pedro 3:9).
Den 1 Corintionan 6:9-10 tur esnan cu lo no hereda e reino di Dios ta wordo menciona.Tur hende por samina nan consenshi y bisa Dios, Oh mi Señor mi ta sinti cu mi ta faya cu bo, Señor tene misericordia di mi, pordona mi, mi ta reconoce y acepta Cristo Hesus como mi Señor y Salbador, y mi ta pidi Bo pa scirbi mi nomber den e buki di bida.