“Nan a pidi te luna di maart di e aña aki pa finalisa e negociacionnan di traspaso y Ministerio di Infrastructura ta sostene esaki”
Dialuna mainta durante conferencia di prensa di Gobierno di Aruba , Prome Minister Evelyn Wever-Croes a elabora riba e proceso di privatisacion di e departamento di Riool Water Zuiverings Instalatie (RWZI).
Prome Minister a indica, cu manera a wordo anuncia aña pasa, Minister Glenbert Croes y Minister Ursell Arends lo ta esunnan encarga cu e aspecto di RWZI. Actualmente e departamento di RWZI ta resorta bou di Dienst Openbare Werken (DOW) cu ta cay bou ministerio di Infrastructura. Recientemente, Prome Minister tabata den Parlamento pa trata e presupuesto di DOW y a constata cu tabata tin falta di informacion tocante e tema di RWZI, y a haya importante pa comparti e informacion necesario cu e comunidad di Aruba.
Prome Minister a splica cu aña pasa Gobierno a tuma e decision pa cuminsa cu e proceso di privatisacion di e deparatmento di RWZI. Unabes cu e departamento ta privatisa, lo traspasa esaki na Utlities Aruba NV. E plannan ta pa e prome kwartaal di e aña aki, pues mas tarda 31 di maart 2023 e traspaso wordo finalisa. Minister Ursell Arends y Minister Glenbert Croes ta esnan encarga pa negocia den nomber di Gobierno pa asina por yega na e traspaso.
Ta importante pa comunidad sa cu RWZI no ta den un mal estado pa por explota cualkier momento y causa dañonan serio. Gobierno a encarga na haci e trabounan di mantencion mas grandi y lo continua cu e trabounan te ora e traspaso tuma luga, mirando cu tin fondo riba presupuesto pa e trabounan aki. Actualmente, DOW ta concentrando riba elimina e mal holo cu esaki ta causando pa asina sigui cu e proceso di privatisacion y traspaso.
“RWZI ta bay wordo privatisa. A pidi te luna di maart di e aña aki pa finalisa e negociacionnan di traspaso y nos di Ministerio di Infrastructura ta sostene esaki.” Prome Minister a expresa