Minister President Evelyn Wever-Croes ta lamenta e inkietudnan cu tin na pia di trabou den e Departamento DIP y a conseha sindicatonan pa busca e dialogo na mesa. E situacion cu a wordo describi den un carta cu Minister President a ricibi siman pasa di un grupo di empleado, ta indica cu e relacion di trabou ta bou di presion y esaki ta hustamente na mesa mester yega na solucion.
Mesora Minister President a pidi Director di DIP pa su banda di medaya. Y basa riba esaki Minister President a informa sindicato SEPPA ta na mesa cu director nan mester cuminsa.
Tambe Minister President a informa SEPPA cu debi na e pandemia y tur e retonan cu e pandemia ta trece cu ne, su agenda no ta permiti pa sinta awor cu e empleadonan pero a ofrece, si sindicato no logra sali afo cu e director, cu Minister President lo institui un comision pa atende e problema y ya caba Minister President a pidi Director di Departamento di Recurso Humano y Director di Bureau Integriteit Aruba, pa papia cu esnan envolvi pa purba yega na un solucion y un conseho pa e Minister.
Minister President ta pidi tur partido envolvi pa na forma sensato purba yega na un solucion. DIP ta enfrentando hopi reto. Ademas tin miles di ciudadano ta wordo perhudica pasobra nan no ta haya e tereno cu nan tin hopi aña ta warda riba dje. Ban atende cu conflictonan interno paden, y sigui brinda servicio na e miles di ciudadano cu tin hopi aña ta warda.
