Na 25 di maart 1977, Aruba a haci historia cu e promer Referendum consultativo den Reino Hulandes, un evento cu a marca pa semper e caminda di nos isla rumbo na autonomia.
A pesar cu Aruba tabata un territorio chikito cu apenas 60 mil habitante, e pueblo a haya liderazgo den e gran visionario Betico Croes, un luchador cu fe, corahe y determinacion pa defende e derecho di autodeterminacion di nos pueblo.
Durante hopi aña, Aruba tabata den un posicion dificil den e constelacion Antiyano, como minoria politico y sin instrumentonan economico pa dirigi su propio desaroyo. E pueblo a perde confiansa den e politica tradicional, y esaki a resulta finalmente den e fundacion di MEP na aña 1971, cu a reanima e lucha pa autonomia.
Cu e lema “Vox Populi, Vox Dei” (Voz di Pueblo ta Voz di Dios), gobierno di Aruba a organisa e Referendum pa laga e pueblo expresa su deseo democraticamente. A crea comisionnan di Referendum y Informacion cu a garantisa debate, educacion y participacion popular na henter isla.
A pesar di oposicion di Hulanda, gobierno Antiyano y un boycott total di AVP, e Referendum a sigi dilanti. E resultado tabata cla y abrumador:
82.5% di e votadornan a duna un mandato solido pa Aruba sali for di e constelacion Antiyano.
E proceso a haya reconocimiento internacional, cu observadornan y periodistanan for di diferente pais, y tambe a marca un paso progresivo ora cu hobenan di 18 aña, aunke no Hulandes, a haya derecho di vota.
Aunque e resultado a wordo menosprecia na e momento, historia a comproba su balor. E Referendum di 1977 a bira e instrumento decisivo cu finalmente a conduci Aruba na su Status Aparte na 1 di januari 1986.
25 di maart 1977 — un simbolo di curashi, unidad y determinacion di e pueblo Arubano.
Honor y respet eterno na Betico Croes, Libertador di Aruba.
