ORANJESTAD,Aruba
Despues di dos luna ainda sindicatonan di trahadonan di Gobierno ta den un discusion formal cu menasa di welga pa motibo di mester entrega 5% di nan salario.
Un 5% cu riba un salario di mas abou ta nifica un 110 florin di reduccion mientras cu mas halto e salario ta mas halto e suma ta bira. E suma aki ta mustra hopi pero en general e salario den sector gubernamental ta mas halto.
Den sector priva, di cual mas cu 70% di e trahadonan no ta trahando y ta hayando un subsidio di salario ta rond di 2200 of menos. Di e grupo aki cu a perde practicamente tur cos, awo a pidi un sacrificio di 20% pa nan por haya subsidio di salario toch. Esaki ta nifica cu mientras e ambtenaar ta wordo pidi pa entrega 5% cu ta 110 florin si e ta gana 2200 florin, e persona trahando den sector priva ganando e mesun 2200 florin a wordo pidi pa acepta un reduccion di salario di 440 florin.
Sector priva, cu ta consisti di 80% di e forsa laboral, ta esun cu Semper a carga di economia di Aruba. Ta sector priva ta esun cu Semper a percura pa salario di empleadonan publico, a percura pa mayoria di entrada den caha di Gobierno y pesey ta esnan mas afecta pa e crisis di coronavirus. Cu e lockdownnan un gran mayoria di trahadonan di sector a bay cas sinta warda pero man bashi, mientras cu ambtenaarnan a wordo manda cas cu nan salario completo.
Pa yuda e grupo mas grandi di trahadonan afecta, mester pidi yudansa na Hulanda, cu ta nifica cu Aruba ta na merced di Hulanda. Madre Patria a presta Aruba placa pa yuda empleadonan di sector priva pero naturalmente a pone condicionnan cu Gobierno mester baha su gastonan, entre otro e gasto di personal cu ta un dolor pa hopi aña caba. Sin e ayudo aki Aruba ta bati bancarota y ora no solamente esnan di sector priva, 37 mil persona, ta wordo afecta pero tambe e casi 8 mil ambtenaarnan cu e país aki di 120 mil habitante tin.
E sacrificio cu ta wordo pidi no ta hopi pasobra tur luna dianan 23 of 24 di luna, ora cu Gobierno paga, caya ta hopi druk pasobra ambtenaarnan a cobra y a subi caya pa gasta placa, mientras cu otronan mester conta placa pa logra paga debe y come luna completo. Pesey protestanan cu tabatin intencion di parti di sindicatonan no tin sentido. Ora cu a kere cu esnan cu a perde 40, 60 of 100 porciento di nan entrada a spera di lo a subi caya pa demostra nan malcontento,sin embargo ta esnan cu ta perde 5% y no e otronan ta esnan cu kier subi caya pa mustra nan malcontento pasobra NO kier pa corta nan salario.
E splicacion cu e reduccion di salario ta afecta nan pensioen ta incomprondibel pasobra a lop largo, na momento cu nan baha cu pensioen e lo afecta e suma cu nan ta haña cu 4 florin of 4,50 florin PA LUNA. E pregunta e ora ta: di con e egoismo aki ?