Tourism Corporation Bonaire (TCB) tabatin e honor di yama bon biní na algun miembro di e Komishon di Relashonnan den Reino di Tweede Kamer durante nan bishita ofisial na nos isla riba djaweps 8 di mei 2025.
E delegashon ku tabata di bishita a konsistí di: Olger van Dijk (presidente di komishon – NSC), Raoul White (GroenLinks-PvdA), Aukje de Vries (VVD), Faith Bruyning (NSC), Mpanzu Bamenga (D66), Don Ceder (ChristenUnie) i Eva Meijers (grefir di e komishon).
E direktor di TCB Elesiër Angel i e tim di TCB a yama e delegashon bon biní ku un presentashon tokante turismo na Boneiru, e ròl di e organisashon ku ta kambiando riba tereno di merkadeo di destinashon i e vishon stratégiko.
E seshon a ofresé oportunidat pa un diálogo ku hopi sentido, kaminda e miembronan di delegashon a hiba un kòmbersashon habrí tokante tantu e posibilidatnan komo e desafionan ku desaroyo di turismo na Boneiru ta trese kuné.
“Tabata un previlegio pa presentá nos vishon riba turismo di Boneiru na e delegashon importante akí”, segun Angel. “E interkambionan akí ta di importansia pa sòru pa Boneiru su storia, su nesesidatnan i su oportunidatnan ta klaramente representá na Den Haag. Nos ta anhelá pa fortifiká e kolaborashon na benefisio di nos hendenan, nos naturalesa i nos futuro konhunto.”
