ORANJESTAD, Aruba
Oficina di Turismo di Aruba (A.T.A.) conhuntamente cu Departamento di Salud Publico (D.V.G.) ta anuncia cu un total di 2.318 compania y taxista ya caba exitosamente a completa e registracion y pre-checklist cu ta forma parti di e prome fase di e Aruba Health & Happiness Code (HH Code), pa cual nan ta wordo otorga un seyo colorido, cual ta e seyo di pre-check. E programa di HH Code tin como meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba.
Den transcurso di siman pasa, un total di 253 seyo di pre-check a wordo otorga den e sectornan di ‘Accommodations’, ‘Food & Beverage’, ‘Food Trucks’, ‘Watersports’, ‘Taxi’, ‘Retail/Supermarkets/Shops’, ‘Casinos’, ‘Car Rentals’, ‘Tour Operators’, y ‘Spa & Salon’. E compania y taxistanan aki a ricibi un e-mail di confirmacion relaciona cu esaki.
Compania y taxistanan cu a ricibi e email aki por pasa busca nan seyo di pre-check riba diamars of diahuebs na oficina principal di A.T.A. durante oranan di trabou entre 8:30 AM y 12:00 PM of entre 1:00 PM y 4:30 PM. Na momento di busca e seyo di pre-check, mester presenta un copia di e e-mail di confirmacion cu a ricibi y lo mester firma pa asina haya e seyo di pre-check.
A.T.A. ta felicita y gradici tur compania y taxista cu ya a completa e prome fase di e programa cu e meta final pa obtene e seyo di oro. Alabes, A.T.A. ta anuncia e introduccion di e sector di ‘MICE and Social Events’ cu awo tambe por registra pa e HH Code. Companianan cu ta forma parti di e sector aki mester manda un email na healthcode@aruba.com pa asina por ricibi e link pa registra.