ORANJESTAD – Valeria Gomez di Vadavas ta forma parti di e grupo di profesionalnan cu a sigui nan cursonan di Exprodesk na Departamento di Asuntonan Economico, na un manera continuo y hunto cu algun otro damas a yega na e nivel di Master Class “From Zero to Hero: Mastermind- Empowered Women Exporters”. E curso a wordo presenta pa un export coach internacionalmente reconoci cu ta Sra. Taiana Mora di NEX Consulting. Focus principal ta pa e grupo aki di “Empowered Women Exporters” internacionalisa nan productonan, talentonan/servicionan den e mas amplio sentido di palabra.
Cu esaki Exprodesk tin como meta pa encurasha y stimula mas di nos hende muhernan profesional cu tin e potencial pa exporta cu nan tambe lo por logra esaki door di cera conoci cu e hende muhernan di “Empowered Women Exporters”.
Valeria Gomez ta parti di e team di fundadornan di VADAVAS, como un hoben entrepreneur. Valeria ta un di e yiu muhernan di e fundadora di Vadavas, un joyeria cu a lanta na 2013 inspira pa Valentina, Daniela, Valeria y Sebastian. Su mama como un mama soltera a bin cu un concepto nobo na Aruba. Nan a dicidi cu tur nan productonan ta wordo traha pa mamanan soltera for di nan mesun cas y cu ta bira asina un fuente di entrada pa nan, vooral den e temponan aki.
“Nos ta kere tambe cu nos por salba matrimonionan door di duna e mama di e famia e oportunidad pa por haya un extra entrada. Pero e marca VADAVAS ta enfoca riba e mamanan soltera primordialmente y nan famia. Nos sa cu nan mester un ayudo extra, pa nan por provee amor y tempo di calidad cu nan yiunan cu mester di esaki hopi biaha desesperadamente.”, Valeria ta expresa.
Con nan ta hacie?
Mayoria mamanan tin mas cu un trabou, pa e motibo aki hopi bes e yiunan ta wordo lanta door di tur hende menos e mama. Ta p’esey Vadavas ta duna e mamanan trabou cu nan por haci na cas. Di e manera aki e di dos trabou lo no separa nan di nan yiunan.
Awendia por haya e articulonan di joya VADAVAS den varios diferente tiendanan rond di Merca, danki na diferente exposicionnan cu Valeria y e team a atende den pasado y na unda cu turistanan a topa e marca VADAVAS na e tienda na Paseo Herencia Mall na Aruba y nan a enamora di e marca y full e concepto. VADAVAS a habri awo nan prome franchise den HHI South Carolina. E comienso humilde di Valeria su mama ta skirbi caba como prome pagina di un buki cu ainda no a termina, pero ta priminti di bira uno hopi interesante cu tur e pasion y dedicacion cu e team di VADAVAS ta traha cu ne na unda nan a yega e total di 150.000 acesorio.
Recientemente mirando cu Covid-19 ta rekeri pa hende bisti un tapaboca, VADAVAS a inova cu tapabocanan unico y elegante cu ta obtenibel den nan tienda actualmente. Cu esakinan a añadi un segment nobo den nan productonan.
Na 2013 na momento cu Vadavas a cuminsa cu mas o menos 20 dollar Mericano a cana un caminda largo pero cu un motivacion fuerte den nan concepto: E mihor tin di bin ainda!
Pa sa mas di Valeria y Vadavas por bishita su website www.vadavas.com
