Hues a dicta sentencia pa e hombernan Z.T., J.A., D.P. y A.F., kendenan ta wordo acusa di a haci 3 atraco cu violencia riba riba 3 Augustus 2025 y menaza hende cu arma.
Por a compronde cu 3 di e cuater acusadonan, e exigencia di castigo di Fiscal, Hues no a sigui. Hues a baha e castigo pasobra tin partinan cu el a declara e acusadonan liber.
Por a nota cu solamente Z.T. y J.A. a presenta den Corte. E otro dos acusadonan D.P. y A.F. no kier a bin Corte pa scucha nan castigo y a keda na KIA.
EXIGENCIA DI FISCAL
Na Januari 2026 tratamento di e caso a tuma lugar caminda Fiscal a exigi pa J.A. 4 aña di prison di cual 6 luna ta condicional, pa D.P. 3 aña di prison di cual 6 luna ta condicional cu 3 aña di prueba, Pa Z.T., Fiscal a exigi 3 aña di prison y pa A.F. 12 luna di prison. Tambe Fiscal a exigi pa pone ariba e exigencia e castigo condicional cu e mayoria di e acusadonan tin, pasobra nan a comete e delitonan aki den nan tempo di prueba.
SENTENCIA
Hues a mustra cu J.A. a admiti di a ranca cadena for di hende na Coconuts, Calibra y Lekker Bar. Hues a reacciona riba defensa di abogado cu a bisa cu J.A. a acuta den defensa propio door cu a ranca cadena for di su garganta, el a bay ranca di otronan.
Hues a mustra cu J.A. na Calibra y Lekker Bar, a ranca cadena di hende y hasta bringa cu e victimanan cu el a atraca. Hues a remarca cu ranca cadena di otro no ta defensa propio. E ta mas bien un accion di venganza. Hues ta haya cu J.A. ta e agresor y no por papia di defensa propio.
HUES A BAHA CASTIGO
Hues a bisa cu Fiscal a exigi 48 luna di prison di cual 6 luna ta condicional. Pa cu e castigo Hues a mustra cu J.A. tabata forma parti di un grupo cu a haci delitonan serio. Promer na Coconuts despues Calibra y Lekker Bar. A ataca hendenan cu a bay na e lugarnan aki y a maltrata nan. A usa menaza cu arma. Esaki ta inacceptabel! Hues ta haya cu a crea inseguridad na lugarnan di bishita y den comunidad. Hues a mustra cu segun ley, pa ranca cadena ta castiga 2 aña di prison, pa posecion di arma den auto ta castiga 12 luna di prison. Hues no ta mira motibo manera abogado ta pidi pa aplica castigo hubenil. Hues a remarca cu J.A. ta adulto caba. Hues a bisa cu e ta tene cuenta cu ta promer biaha cu J.A. ta cay den man di husticia. Tambe Hues ta tene cuenta cu Reclasering a traha raport di J.A. y ta conseha pa J.A. cay bou guia. Hues a condena J.A. na castigo combina pa asina J.A. haya guia di Reclasering y pone presion riba J.A. pa no haci algo similar. Hues a condena J.A. na 36 luna di prison di cual 8 luna ta condicional cu 3 aña di prueba. E tempo di prueba J.A. ta cay bou guia di Reclasering.
MENAZA CU ARMA
Pa Z.T., Hues a bisa cu e tabata envolvi den e peleanan y a menaza cu arma na Cucunots y Lekker Bar. Hues a declara Z.T. liber di atraco na Calibra y tambe a declara Z.T. liber di menaza cu arma na Lekker Bar. Hues no ta haya cu tin suficiente prueba. Pero si Hues ta haya Z.T. culpabel di a menaza na Coconuts, violencia publico na Calibra, menaza cu arma na Lekker Bar. Tambe posecion di arma di candela hunto cu otronan. Hues a mustra cu Polis a haya un arma di candela ora cu e grupo a purba di huy den auto. Hues a mustra cu Z.T. a maltrata e agente di Polis cu tabata drumi abao. El a rechaza e ponencia di defensa propio di abogado.
Pa cu e castigo, Hues a mustra cu na November 2025, Z.T. a wordo condena na Hulanda na 6 aña di prison pa intento di mata. Hues ta tene cuenta cu e sentencia aki. Hues ta haya cu Z.T. no a para responsabel pa loke el a haci. El a condena Z.T. na 2 aña di prison.
MALTRATO
Pa D.P., Hues a bisa cu D.P. ta wordo declara liber di atraco na Calibra y tambe na Lekker Bar. Hues a bisa cu D.P. ta culpabel pa violencia na Calibra y posecion di un arma di candela den grupo. Hues a rechaza e ponencia di defensa propio. Hues a mustra cu D.P. y Z.T. tabata maltrata e agente di Polis cu tabata benta abao for di tino. Pa cu e castigo, Hues a bisa cu e ta tene cuenta cu a laga D.P. liber condicional pa maltrato di arma. D.P. no a comporta den e tempo di prueba y a comete e delitonan ariba menciona. Hues a bisa cu Reclasering ta haya cu D.P. mester di guia. Hues a condena D.P. na 24 luna di prison di cual 6 luna ta condicional cu 3 aña di prueba.
Pa A.F., Hues a bisa cu A.F. ta wordo declara liber di e atraco na Calibra y Lekker Bar. Hues ta haya A.F. culpabel di violencia na Calibra, caminda a bati un agente di Polis. Tambe Hues ta haya A.F. culpabel di a menaza un hende. Hues a rechaza e ponencia di defensa propio. Hues a bisa cu e victima tabata for di tino riba vloer y A.F. a dal’e skop. Pa cu e castigo, Hues a tene cuenta cu A.F. tin castigo pa droga y a haci e delitonan aki den e tempo di prueba. Hues a confirma e exigencia di Fiscal di 12 luna di prison.
Den tur e sentencianan aki mester tene na cuenta cu e castigo condicional cu tabata colga riba cabez di 3 di e acusadonan, promer cu nan a comete e atraconan cu violencia y menaza cu arma. E castigonan condicional ta wordo poni riba e castigo cu nan a haya awor.