Ex líder di Movimiento Electoral di Pueblo (MEP) y ex Primer Ministro di Aruba, Orlando Nelson “Nel” Oduber, a lanza duru critica riba actual gobierno AVP–FUTURO y particularmente riba actuación di Minister di Relaciones di Reino, Gerlien Croes, calificando su maneho como “un berguensa pa Aruba den Reino Hulandes”.
Segun Oduber, casi un aña despues di instala e gobierno, Aruba ainda no tin un Ministro Plenipotenciario na Hulanda, lo cual e considera inaceptabel. “Sin Ministro Plenipotenciario, Aruba ta sin voz na Hulanda. Esaki no ta solamente un falta administrativo ta un daño político pa pais,” e a afirma.
Rijkswet y contradiccion politico
Oduber a recorda cu MEP anteriormente a opone e Rijkswet, pero segun Oduber, actual gobierno AVP–FUTURO awor “ta brasa e mesun ley solamente pa placa”, sin splica claramente con e ta defende interesnan di Aruba den marco di Reino.
Turismo den caida y clima di inseguridad
E ex Primer Ministro tambe a expresa preocupacion riba sector turistico, señalando cu turismo a cay cerca di 6% recientemente. Segun Oduber, actual gobierno ta “un gobierno di mala suerte”, apuntando na constante problema cu vuelonan, accidentenan, incidentenan violento y un sensacion general di inseguridad na isla.
E a añade cu desde AVP–FUTURO a tuma mando, tin un percepcion di “libertinaje” y deterioro social cu no ta corresponde cu cultura tradicional Arubiano.
Legalisacion di inmigrantenan: ‘error mas grandi di gobierno’
Oduber a califica e proceso di legalización di inmigrantenan como “e error mas grandi di e gobierno actual”. Segun oduber, e proceso a wordo ehecuta sin screening adecuado y sin claridad riba:
- si tin prueba di conducta;
- si e personanan a paga belasting den añanan cu nan tabata ilegal;
- cuanto persona exactamente a wordo legalisa.
“Ta legalisa pa legalisa, sin orden, sin estructura y sin control,” e a enfatisa.
Segun Oduber, e decision aki a contribui na aumento di ladronicianan den turismo y den bario, un fenomeno cu e considera danjo na cultura Arubiano. E a pregunta abiertamente:
“Ki tipo di Aruba nos kier pa nos yiunan?”
Falta di vision di gobierno
Oduber a critica duro riba falta di vision di AVP–FUTURO,
- Kico ta e vision pa turismo?
- Kico ta e rumbo di Aruba?
- Kico ta e strategia pa relacion cu Hulanda y Merca?
Segun Oduber, actualmente no tin ningun plan claro ni direccion strategico pa pais.
MEP versus AVP: debe y maneho financiero
E ex mandatario a defende legado di MEP, señalando cu cada bes cu MEP a goberna, Aruba a keda mas fuerte financieramente. E a destaca cu gobierno anterior di Evelyn Wever-Croes a logra baha deuda nacional di 120% di GDP pa 71%, lo cual significa cu cada florin cu Aruba gana, 71 cent ta bay pa paga debe.
En contraste, segun Oduber, AVP historicamente a laga debe cu interes anual di mas cu 300 miyon florin, y actualmente awo cu MEP den oposicion ta mira cu dañonan ta bolbe crea pa pais.
Desbalance di poder den gobierno
Finalmente, Oduber a señala cu tin un desbalance di poder den coalicion AVP–FUTURO, unda un partido cu solamente tin tres asiento practicamente ta determina rumbo di gobernacion. E a critica cu varios ministro nan ta sin experiencia y ta pone Aruba den un situacion cu, segun dje, “mañan nos tur lo lamenta”.