BonaireInternacional

No tin selebrashon sentral di Dia di Rincon 2021

2048X1152

Pa motibu di e medidanan aktual relashoná ku e vírùs di Corona i e tempu insigur mará na esaki, Entidat Públiko Boneiru den konsulta ku e organisashon FuDeCu di Dia di Rincon a disidí ku e aña aki tampoko no ta laga e selebrashon sentral di Dia di Rincon tuma lugá na e manera di kustumber.

Durante luna di aprel e organisashon lo organisá diferente evento si, ku tur hende por sigui via ‘live streaming’. Esaki ta nifiká ku lo tin un tiki kambio pa loke ta trata e eventonan ku ta mará direktamente na Dia di Rincon.

Dia di Rincon ta un manifestashon kultural anual ku nan ta organisá ya pa 32 aña kaba i ku por konta ku partisipashon di mas ku 4000 hende. E meta prinsipal ta pa trese hendenan huntu pa di e manera ei laga nan gosa di tur e partinan importante di e patrimonio kultural di Boneiru.

E aña aki pa di 31 biaha lo organisá ‘Kanto Krioyo’ ku ta parti di esaki i kaminda ta kanta tambe tokante tradishonnan, kustumbernan i leyendanan. Kanto Krioyo konosé un promedio di 1500 bishitante.

Durante un reunion kaminda diputado sra Nina den Heyer, e hefe interino di SKAL sr Felix Thomas, e presidente di Fudecu i organisadónan di Kanto Krioyo tabata presente, konhuntamente a tuma e desishon difísil pa e aña aki na otro manera duna forma na e festividatnan rònt di Dia di Rincon.

Tantu e organisashon komo tambe Entidat Públiko Boneiru ta indiká ku Dia di Rincon ta un dia di fiesta nashonal ku mester keda ku su derecho di eksistensia. Sinembargo e ta un evento tambe ku ta atraé hopi hende lokal i turista. Pa e motibu aki no ta responsabel pa laga e evento sigui na e manera original.

A palabrá ku sierto aktividatnan lo tuma lugá ku algun kambio ku ta kuadra ku e medidanan di prekoushon relashoná ku e situashon aktual. Den e temporada binidero ta sigui traha riba e programashon alternativo pa di e manera ei tòg por selebrá e aktividatnan kultural di Dia di Rincon e aña aki.

Segun diputado sra Den Heyer: ‘Na interes di bienestar general di nos poblashon, den e tempu aki di e vírùs di Corona, nos no por tuma niun otro desishon ku no ta di laga e festividatnan ofisial rònt di Dia di Rincon tuma lugá na un otro manera e aña aki.’

Related posts

Shete luna di e gobernashon nobo: Un káos total na Finansa

EA News Author

Preliminary Results of January 2023 Tourism in Bonaire: 16,285 Stayover visitors

EA News Author

Spich di gezaghebber edison rijna riba 2 di desèmber

EA News Author

Leave a Comment

Whatsapp Message