Porfin tin presupuesto, algo cu Gerlien ta tin secuestra desde final di december 2024. Nos mester a warda pa nan a vota pa Marlon Sneek por a bira presidente y pa asina e yama e reunion ey diabierna siman pasa. Apesar cu e presupuesto a wordo aproba unanimamente mi tin preocupacion tocante e recorte cu Geoffrey Wever a implementa. Minister Geoffrey Wever tawata na altura cu gobierno anterior a laga tur cos cla pa yuda FCCA. Pero cu Mike na cabes awor hunto nan a scoge pa kita 20 miyon florin destina pa construccion di cas social. Kiermen tur e plan pa traha mas cas, awor lo ta sigur te otro aña. Kisas!
Huur di casnan social por bay bira mas caro
FCCA ta traha su placa pa sigui duna huur atractivo na ciudadanonan atraves di subsidio di gobierno y e casnan cu nan por huur o bende. Si FCCA no por haya ayudo di Gobierno manera esaki, nan prijsnan lo aumenta mas, nan lo traha menos cas, y esnan cu ta na huur lo por bira mas caro. Porta cu loke gobierno Eman-Wever-Croes a haci aki lo bay afecta e stabilidad di huur pa e famianan cu ta biba den cas di FCCA.
Nos ta sigui ta atento
Di parti di Fraccion di MEP nos a tuma contacto cu FCCA y mas cu claro nan no ta contento cu e decision aki. Fraccion di MEP lo sigui ta skerpi, sigui haci pregunta, informa comunidad, tene contacto cu pueblo y tambe keda den contacto cu departamento y fundacionnan. Sigur e no por keda asina aki!
