Inscripcionnan pa e siguiente edicion di Playa Film Festival a habri. E edicion seis di e festival lo ta celebrando e di 50 aña di Aruba su Himno y Bandera cu diferente actividadnan creativo. ‘Mi baranca stima’ ta un tayer di cine y competencia specialmente diseña pa scolnan secundario. Studiantenan lo siña con pa traha un mini documentario contando di nan amor pa Aruba. Tur e documentarionan lo participa den Playa unda cu un panel di hurado lo saca e ganador di e miho ‘Mi baranca stima’ documentario. E mas reciente competencia escolar di Playa, EPB San Nicolas a gana e premio pa e miho School Short Story. Scolnan secundario interesa pa participa por manda un email na info@cinearuba.com pa mas informacion.
Playa su categoria di competencia di ‘Di Aruba’ lo ta bek cu atencion pa peliculanan original cu ta promove Aruba su cultura. E categoria aki ta enfoca riba produccionnan na Papiamento y storianan autentico cu primicia mundial na Playa Film Festival. Pa e competencia aki lo tin tres premio: Miho Pelicula Cortico Di Aruba, Miho Storia Autentico Di Aruba y e Interpretacion Destaca Di Aruba. E aña aki Blachinan Blanco di Ronney Dotel a bay cu e premio publico pa e miho pelicula cortico di Aruba.
Playa su lema pa 2026 lo ta Aruba Dushi Tera poniendo enfasis riba Aruba su Himno y e colornan di e diseñonan visual di Playa lo ta blau cu geel manera Aruba su Bandera.
E festival lo tin diferente categorianan nobo na banda di Kingdom of Shorts cu ta e categoria mas popular di Playa. Kingdom of Shorts den edicion cinco di Playa tur dos presentacionnan tabata sold out. Sunny di German Gruber Jr. di Curaçao a bay cu tur e premionan incluiendo e di miho pelicula cortico. E categoria di Kingdom of Shorts ta pa peliculanan cortico di Aruba, Curaçao, Bonaire, Sint Maarten, Saba, Sint Eustatius y Hulanda cu primicia pa Aruba na Playa Film Festival.
Te cu fin di juni 2026 por inscribi un pelicula pa consideracion y ta acepta inscripcionnan unicamente via Filmfreeway. Inscripcion no ta garantisa un luga den e programa di e festival. Playa tambe ta sigui e mes un proceso di e festivalnan internacional: Tur pelicula ta pasa door di un proceso di seleccion y na final lo selecta e peliculanan cu ta relevante pa e programa y e festival. E resultado ta un seleccion oficial di peliculanan. Pa inscripcion y informacion detaya bishita filmfreeway.com/playafilmfestival. Ta sugeri pa lesa tur informacion prome cu inscribi un pelicula ya cu otro aña lo tin presentacionnan online tambe. E festival lo ta bek na e prome fin di siman di october otro aña na Caribbean Cinemas. Inscripcion pa peliculanan di ficcion y documentarionan local ta completamente gratis.
Press release: Fundacion CINEARUBA
