Plataforma Nacional Herencia di Sclavitud na Aruba (PNHSA), den su calidad di fundacion, a entrega un carta formal na Parlamento di Aruba pa boga pa halsa e importancia y e impacto di e afro-arubianonan den nos comunidad. Den e comunicacion aki, e fundacion a trece dilanti nan preocupacion encuanto esfuersonan di parti di e Estado Hulandes pa acelerar nan maneho pa reintroduci e servicio militar obligatorio, conoci como “Dienstplicht”.
Preocupacion pa militarizacion di Reino
Segun Sirelda Jackson, presidente di PNHSA, e fundacion a tuma nota di esfuersonan cu Hulanda ta realizando ariba tereno Europeo pa reintroduci e militarizacion mandatorio. E medida aki, cu ta obliga e ciudadanonan na Hulanda pa pasa un tempo den e “Armada” di Hulanda, ta genera preocupacion pa e islanan di Caribe.
Jackson a enfatisa cu, debi cu e islanan ta forma parti di e Reino Hulandes, e decisionnan aki tin consecuencianan directo pa nos hobennan, tantu homber como muhe.
Rechaso pa decisionnan unilateral
PNHSA ta mantene un postura firme contra e manera con Estado Hulandes ta tuma e decisionnan unilateral aki sin consulta cu e pueblo di Aruba como ciudadano. Segun e fundacion, e pueblo no a haya oportunidad di bisa nada den e decisionnan y e esfuersonan cu Hulanda ta tumando ariba e tereno geopolitico aki.
Aruba como zona di paz
E fundacion ta considera e esfuersonan di militarizacion como un peliger pa e islanan, mirando cu nan ta biba den e Caribe como un “zona di paz”. PNHSA ta enfatisa cu e esfuerso principal mester ta pa mantene e islanan den e estado actual di paz, en bes di promove e militarizacion cu ta wordo prepara na e pais leheno, Hulanda.
Jackson a conclui bisando cu e fundacion lo sigui monitoria e noticieronan procedente di Hulanda di cerca, unda nan a constata cu tin un maneho andando cu ta hibando nan pa promove militarizacion obligatorio.