Tourism Corporation Bonaire (TCB) ta orguyoso di por anunsiá firmamentu di un Akuerdo di Intenshon (Memorandum of Understanding – MOU) ku Ricardi Muñoz, ku kua e ta keda nombrá ofisialmente komo embahador lokal di Boneiru pa aña 2026.
Ricardi Muñoz, kende a nase dia 15 di mart 2007, ta un bòksdó hóben ku hopi dedikashon, i ku tin shete aña kaba ta praktiká e deporte akí. Originalmente prosedente di Repúblika Dominikana, Ricardi tin dies aña kaba ta biba na Boneiru i e ta konsiderá su mes komo un berdadero boneriano, ku ta brasa e kultura, e komunidat i e bunitesa natural di nos isla.
Ricardi ta konosí pa su disiplina, su resiliensia i su determinashon, i e ta trein seis biaha pa siman, hopi biaha dos bes pa dia, miéntras e ta sigui aspirá su pashon pa bokseo i krese komo atleta i komo ‘role model’ pa hóbennan di Boneiru. Ricardi, kende aktualmente ta bòks riba nivel di amatùr élite, ta soña pa un dia alkansá e nivelnan di mas haltu di bokseo internashonal i representá Boneiru riba e tarimanan di mas grandi na mundu.
Aktualmente Ricardi ta representando Boneiru na e Brazil Grand Prix na Rio de Janeiro i mas lat den e aña akí e ta programá pa kompetí na Sint Maarten, Brasil i Colombia, kaminda ku orguyo e ta bai karga nòmber di Boneiru riba tarimanan internashonal.
Elesiër Angel, direktor di TCB a bisa: “Nos ta kere ku nos mihó embahadornan ta habitantenan di Boneiru. Ricardi su dedikashon, su disiplina i su ambishon na un edat asina hóben ta duna inspirashon i nan ta reflehá e resiliensia i determinashon ku nos ke enkurashá den nos komunidat. Dunamentu di sosten na talento lokal ta nifiká invertí den soño, krea oportunidat i empoderá bonerianonan hóben pa kere ku nan por representá nos isla ku orguyo, sea ku esaki ta den deporte, den kultura òf den kualke otro kos. Nos ta orguyoso di por sostené Ricardi riba su kaminda pa partisipashon na kompetensianan internashonal.”
TCB ta orguyoso di por traha huntu ku Ricardi Muñoz i ta spera di dun’é sosten durante henter aña 2026, miéntras e ta sigui inspirá otronan i representá Boneiru ku orguyo riba tarimanan internashonal.
