Luna di augustus ta un luna di recuerdo y orguyo pa e pueblo Arubano. Na augustus 1977, nos pueblo a mustra curashi, determinacion y unidad den un lucha historico pa exigi respet pa e voto y e deseo di libertad di Aruba. E periodo conoci como “Augustus Scur”, cu a cuminsa cu e welga general di 10 di augustus 1977, a marca un momento dificil pero decisivo den nos historia, na unda pa prome biaha sanger a ser derama pa nos libertad.
Despues di dos siman di lucha intenso, riba 18 di augustus 1977, Gobierno Hulandes — bou liderazgo di Minister President Joop den Uyl a anuncia cu no tabatin obheccion pa reuni cu un delegacion oficial di Aruba, basa riba artikel 26 di ERNA, cu ta duna Aruba e derecho pa bati na porta di Hulanda den caso di conflicto.
Riba 19 di augustus 1977, Eilandsraad di Aruba a tuma un decision unanime pa manda un delegacion den un solo bloke, representando politica, sindicatonan, comercio, industria y clero, pa defende e deseo ferviente di e mayoria di e pueblo Arubano: libertad y autodeterminacion. E delegacion a yega Hulanda riba 3 di september 1977.
Miembronan di e delegacion oficial tabata: G.F. (Betico) Croes – lider di e delegacion, Daniel Leo, Grace Bareño, Clive Lacle, Pedro (Charro) Kelly, Ralph Richardson, Watty Vos y Selwyn Spanner. Consehero tabata diputado John v/d Kuyp.
Representantenan sindical:
Julio Quijada (GWU), M. Malmberg (ANAAB), Ruben Hoek (UPA), Sonny Harms (UEA), M. Croes (VWA)
Representantenan di comercio y industria:
- de Cuba (ATSA), E. Arends, M. Roos (Camara di Comercio), D. Mansur, H. Timmer, M. Kuiperi (ATIA)
Secretario di e delegacion: J. Wever
Durante e reunionnan cu Gobierno di Reino, Betico Croes a pone cla cu e pueblo Arubano kier usa su derecho di autodeterminacion y cuminsa prepara pa su libertad. Pa promer biaha, Hulanda a scucha oficialmente e voz di Aruba, algo cu no tabata posibel prome cu e accionnan heroico di Augustus Scur.
E lucha aki tambe a mustra e union fuerte di pueblo Arubano. Desde fundacion di MEP na 1971, Betico Croes a semper impulsa unidad. Esaki a bira mas visibel despues di introduccion di nos bandera y himno na 1976, y a culmina den un delegacion cu a representa henter e pueblo sin distincion politico.
Danki na e sacrificionan, e unidad y e liderazgo fuerte di e tempo ey, Aruba awe ta disfruta di su Status Aparte, un logro cu nunca mester wordo lubida.
Augustus 1977 – un lucha cu a cambia destino di Aruba pa semper.
*3 juni 1985
