Mientrastanto cu Gobierno di Aruba ta preparando pa duna claridad riba e maneho nobo pa e sector di ‘vacations rental’ pa prome di juni, e preocupacion den e industria mes ta wordo sinti. E doñonan di cas y representantenan di e sector ta boga pa un regulacion, pero ta pidi pa esaki cana den e realidad di Aruba y cu lo hiba e isla padilanti, specialmente mirando cu e cooperacion directo cu nan den preparacion di e ley aki tabata no tabatin.
Despues cu Minister di Asuntos Economico, Geoffrey Wever, a anuncia cu e ley y maneho holistico interministerial ta den su fase final di afrondamento, e reaccion di e sector no a tarda pa duna cara. E doñonan di cas y operadornan ta duna un ‘sí’ rotundo na e mesun regulacion cu nan tin shete aña ta pidi, pero nan ta bati alarma riba e falta di representacion den e combersacion final.
Miedo pa comparacionnan robes cu New York of Amsterdam
Contrario na loke hopi por pensa, e sector mes no kier un mercado de ‘free-for-all’. Nan mesun bosnan ta splica cu nan kier wordo controla formalmente pa asina Aruba keda wordo mira como un destino serio y structural. Sinembargo, e temor grandi ta sinta den un regulacion cu no ta wordo adapta na un economia cu ta biba full un biaha di turismo.
“Loke nos tin un tiki miedo di dj’e ta un regulacion cu no ta husto, of cu no ta cana den e realidad di Aruba. Hopi biaha hende ta compara nos cu ciudadnan manera New York of Amsterdam, cu no ta un isla cu ta biba 100% di turismo. Nos kier e regulacion, nos kier djis haci sigur cu e ta un regulacion husto, corecto y cu lo beneficia e isla,” Asina Alex Cybul propetario di vacations Rentals
Sin un stul na mesa cu e expertonan
A pesar cu Minister Wever a indica cu ‘expertonan’ ta traha hunto cu e ministerionan, e operadornan cu ta maneha e negoshi aki ‘day in, day out’ a confirma cu nan no a wordo acerca pa forma parti den e curason di e combersacion di con pa structura e leynan aki. Nan participacion a wordo limita na reunionnan inicial hopi superficial caminda a duna algun explicacion general di ideanan, sin drenta den detayenan structural.
E representantenan ta mustra cu pa shete aña largo, bou di diferente gobiernonan y den reunionnan cu departamentonan manera Departamento di Impuesto (DIMP) a trece topico aki padilanti pa regulacion.
E peliger di no comprende e ‘spin-off’
Un di e puntonan di preocupacion mas grandi di e sector ta e falta di comprension y conocimento total di parti di e decision-makers riba e grandura real di e industria aki y con leu su efectonan ta yega den comunidad.
E operadornan ta pidi pa no desbalansa e ecosistema aki pasobra nan sa cu miles di micro-negoshinan y personanan local for di pintornan, trahadonan di construccion chikito, limpiadonan di piscina, te na chefs priva y e sector di catering ta biba directamente of indirectamente di e pilar economico nobo aki.
A pesar di e falta di involucracion directo na e mesa di decision, e sector ta keda optimista y tin e confiansa di e echo cu porfin, despues di añanan di trata di yega na un regulacion, ‘algo ta pasando’. E industria ta spera cu den e dianan cu ta resta prome cu prome di juni, Gobierno por duna e espacio pa skucha nan guidelines pa duna Aruba un regulacion cu berdad ta proteha e local y lo beneficia full e comunidad.
Sector di ‘vacation rental’ ta boga pa un regulacion husto, pero ta lamenta falta di participacion den e ley nobo
